Турскиот претседател и грчкиот премиер на средбата во Њујорк ја потврдија позитивната клима во односите

ЊУЈОРК (АА) - Турскиот претседател Реџеп Таип Ердоган и грчкиот премиер Киријакос Мицотакис на средбата во Њујорк ја потврдија позитивната клима во билатералните односи, соопшти Канцеларијата за комуникации при турското Претседателство, јавува Анадолу.

Состанокот се одржа вчера во Центарот „Туркеви“ на маргините на 78. Генерално собрание на ОН, а на него присуствуваа и турскиот министер за надворешни работи Хакан Фидан и неговиот грчки колега Јоргос Герапетритис.

„Двајцата лидери ја потврдија позитивната клима во односите меѓу Туркије и Грција и нивната решеност да ја зачуваат“, соопшти Канцеларијата за комуникации.

„Лидерите, исто така, ја потврдија и Мапата на патот и временската рамка за контактите меѓу двете земји договорени на состанокот на министрите за надворешни работи во Анкара на 5 септември, кои вклучуваат: средба во средината на октомври на замениците-министри за надворешни работи одговорни за политичкиот дијалог и позитивната агенда; состанок во ноември за мерките за градење доверба и состанок на Советот за соработка на високо ниво Туркије - Грција на 7 декември во Солун“, се вели во соопштението.

Двајцата лидери разменија мислења и за регионални и меѓународни прашања.

„Тие разговараа за феномените на природните катастрофи и климатската криза, особено во регионот на Медитеранот, кои многу ги погодија двете земји во изминатиот период“, соопшти Канцеларијата за комуникации.

Дополнително, Ердоган и Мицотакис се согласија да ја зајакнат билатералната соработка во цивилната заштита како прашање од висок приоритет.

„Тие, исто така, се согласија да работат заедно за решавање на прашањето за миграциите, признавајќи дека тоа е заеднички предизвик за двете земји. Министрите за надворешни работи имаа задача да продолжат со работата и координацијата со цел да се унапреди договорената Мапа на патот“, се додава.