Турција: Во Анталија во еден ден слетале 80 авиони од Русија

АНТАЛИЈА (АА) - ХАТИЏЕ ОЗДЕМИР ТОСУН -

Со повторното воспоставување летови кои беа запрени во рамките на мерките против ширењето на Ковид-19 во Анталија, турската престолнина на туризмот, во еден ден слетале дури 80 авиони кои превезувале туристи од Русија, јавува Агенција Анадолија (АА).

Анталија, една од најпознатите туристички дестинации во светот, е омилено летувалиште на руските туристи.

Според податоците на Кабинетот за култура и туризам на Анталија, минатата година овој град го посетиле 15.644.108 туристи, од кои 5.582.763 биле Руси.

Во Анталија во понеделникот, на 10 август, допатуваа 80 авиони од Русија, со кои на популарната туристичка дестинација на јужниот дел на Турција дошле над 23.000 туристи.

Претседателот на Здружението на медитерански туристички хотелиери и оператори (AKTOB), Еркан Јагџи, во изјава за АА рече дека Анталија е една од најзначајните туристички дестинации за Русите.

Тој истакна дека туристичкиот сектор вложил напор за да понуди сигурен туризам во времето на пандемијата и додаде дека е многу важен интересот на гостите од Русија.

„Интересот ќе расте сѐ додека нудиме безбеден и здрав туризам“, изјави Јагџи.

Претседателот на Здружението на професионални менаџери на хотели (POYD), Улкај Атмаџа, напомена дека станува збор само за почеток на туристичката сезона.

„Русите сакаат да патуваат. Анталија им нуди природа, културно наследство, море, сонце, плажи. Во изминатите десет дена имавме значаен раст на резервации, што нѐ прави среќни“, изјави Атмаџа.

Тој истакна дека туристичкиот сектор во Турција се придржува до мерките против ширењето на коронавирусот, и заклучи дека интересот на странските туристи е плод на таквото одговорно однесување.