Турција потпиша со американска агенција договор за грант за нуклеарни технологии од следната генерација

Турската компанија за нуклеарна енергија (TUNAS) и Американската агенција за трговија и развој (USTDA) потпишаа договор за грант кој се однесува на мали модуларни реактори и реактори од четвртата генерација. Церемонијата на потпишување се одржа во Турската куќа во Њујорк, соопшти денес турскиот министер за енергетика и природни ресурси, Алпарслан Бајрактар, пренесува Анадолу.

Во објава на социјалната мрежа X, Бајрактар ​​истакна дека договорот ќе ѝ овозможи на Турција сеопфатно да ја процени техничката, економската и регулаторната изводливост на нуклеарните технологии од новата генерација.

„Во согласност со нашите цели за постигнување нулта нето-емисија до 2053 година и целосна енергетска независност, посветени сме на диверзификација на нашиот енергетски микс“, додаде тој.

„Покрај нашите нуклеарни централи од голем обем, со одлучност ќе продолжиме да градиме цврста и модерна енергетска инфраструктура, преку темелно истражување на алтернативите што најдобро одговараат на потребите на нашата земја“, нагласи турскиот министер.