Турција, Јордан и Сирија потпишаа трилатерален договор за транспорт за поттикнување на регионалната трговија

Турција, Јордан и Сирија денес потпишаа трилатерален меморандум за разбирање за соработка во транспортот, со цел зајакнување на регионалната поврзаност и поттикнување на трговијата по должината на клучниот коридор Север-Југ, јавува Анадолу.

Турскиот министер за транспорт и инфраструктура Абдулкадир Уралоглу, говорејќи по состанокот во Аман со јорданскиот колега Нидал Катамин и сирискиот министер за транспорт Јаруб Бадр, изјави дека оваа иницијатива ја одразува заедничката посветеност на регионалниот развој и просперитет.

„Ова не е само технички состанок за транспорт, туку силен израз на волја за благосостојба на нашите народи и за регионален развој“, рече Уралоглу, нагласувајќи ја важноста на политичката и економската стабилност поддржана од ефикасна логистика.

Тој истакна дека активирањето на оската Турција-Сирија-Јордан со полн капацитет значително ќе ги зголеми извозниот потенцијал и транзитните приходи за сите три земји, создавајќи мултипликативен ефект за регионалните економии.

Уралоглу ја истакна стратегиската важност на воспоставувањето целосно функционален транспортен коридор Север-Југ, поддржан од модернизирана патна и железничка инфраструктура. Исто така, тој укажа на потребата од намалување на транзитните такси, даноците и дополнителните трошоци за да се олесни прекуграничниот транспорт.

Министерот рече дека трилатералниот механизам ќе помогне во отстранувањето на бариерите со кои се соочуваат транспортните оператори, ќе ги прошири можностите во железничкиот транспорт и ќе ги ревитализира пристаништата, што во крајна линија ќе придонесе за одржлив трговски раст.

Повикувајќи се на историските врски, Уралоглу ги истакна симболичната и практичната важност на заживувањето на железничката пруга Хејаз - изградена од отоманскиот султан Абдулхамид Втори и пуштена во употреба во 1908 година за да го поврзе Истанбул со Мека, Медина, Јемен и Дамаск - во согласност со модерните стандарди, истовремено давајќи му приоритет на развојот на нови железнички врски меѓу трите земји.

Тој дополнително укажа на интеграцијата на поморските патишта, забележувајќи дека капацитетот на медитеранските пристаништа на Турција и Сирија, во комбинација со стратегискиот пристап на Јордан до Црвеното Море преку Акапскиот Залив, треба да се проценат како единствена логистичка мрежа.

„Пристаништето Акаба може да служи како копнено-морски мост, транспортирајќи ја стоката што пристигнува од север кон Црвеното Море и пошироко“, рече тој.

Уралоглу додаде дека се очекува технички делегации да ја посетат Саудиска Арабија следната недела како дел од пошироките напори за проширување на поврзаноста низ Арапскиот Полуостров и негово поврзување со Централна Азија и Европа.