Чавушоглу: „Планот на ОН за коридор за транспорт на пченица е разумен и остварлив“

АНКАРА (АА) - Турскиот министер за надворешни работи, Мевлут Чавушоглу, денеска во Анкара изјави дека планот на Обединетите нации (ОН) за транспортен коридор на пченица е разумен и остварлив, јавува Агенција Анадолија (АА).

„Зборуваме за механизам што може да се воспостави меѓу ОН, Русија, Украина и Турција, веруваме дека тоа е разумен и остварлив план“, рече Чавушоглу на прес-конференцијата по средбата со рускиот колега Сергеј Лавров, додавајќи:

„Верувам дека заеднички треба да го отвориме патот за извоз на производи од Русија и Украина кои се извезуваат во светот.“

Чавушоглу се осврна на војната меѓу Русија и Украина, велејќи: „Гледаме дека има попозитивна атмосфера за враќање на преговорите отколку пред неколку недели.“

Една од темите на разговор со Лавров беше и ситуацијата на северот на Сирија, односно терористичката закана од тој дел на Сирија.

„Терористичките организации кои се закана за територијалниот интегритет на Сирија и стануваат сѐ поголема закана за нас, мора да бидат расчистени од оваа земја“, рече Чавушоглу.