Шефот на турската разузнавачка служба и сирискиот министер за надворешни работи се сретнаа во Анкара

Шефот на турската Национална разузнавачка организација (МИТ), Ибрахим Калин, денес во Анкара се сретна со сирискиот министер за надворешни работи Асад Хасан ал-Шајбани, при што разговарале за билатералните односи, регионалните случувања и безбедносната соработка, соопштија турски безбедносни извори, пренесува Анадолу.

На средбата, чиј домаќин беше Калин, се разговарало за односите меѓу Турција и Сирија, областите на билатерална соработка, односите со соседните земји, регионалната стабилност, најновите случувања во Либан и односите меѓу Сирија и Либан, наведоа изворите.

Двете страни разговарале и за можните последици за Сирија од предложениот турски Закон за зајакнување на националната солидарност и општествената кохезија.

- Интеграцијата на СДФ и борбата против тероризмот

Калин и Ал-Шајбани направиле преглед на напредокот во процесот на интеграција на Сириските демократски сили (СДФ) и на можностите за зајакнување на соработката во борбата против тероризмот.

Тие нагласиле дека се преземаат конструктивни чекори за успешно завршување на процесот на интеграција на СДФ во Сирија.

На средбата било истакнато и дека сириската Влада продолжува ефикасно да се бори против терористичката организација ДЕАШ како дел од напорите за обезбедување стабилност во земјата.

Двете страни разговарале и за политичките и економските последици од војната меѓу САД, Израел и Иран врз регионот, како и за најновите случувања во врска со санкциите за Сирија и инвестициите во земјата.

На средбата било нагласено и настојувањето на Сирија да остане надвор од неодамнешните конфликти и војни во регионот.