Çiyagerên ji Îdir û Qersê li Keleha Şeytan û Dola Karaçayê geriyan

Çiyagerên ku ji Îdir û Qersê hatin, li Keleha Şeytan û Dola Karaçayê yên li Erdexanê meşa siruştê kirin û wêne kişandin.

Keleha Şeytan û Dola Karaçayê ku bi bedewiya xwe ya dîrokî û siruştî derdikevin pêş, di her demsala salê da di nav cihên ku geştyarên xwemalî û biyanî serdana wan dikin da ne.

Keleha Şeytan ku di zemanekî da ji bo parastinê hatiye çêkirin û bi deriyê xwe yê ketinê yê veşarî bala mirovan dikişîne, di nav cihên giring ên geştiyariyê yên herêmê da ye.

Serokê Kuluba Werzişên Siruştê û Çiyageriyê ya Safariya Çiya ya Îdirê Yunus Guldogdu ji nûçegihanê AAyê ra ragihand ku yek ji rawestgehên geşta wan Keleha Şeytan bû.

Guldogdu anî ziman ku gihîştin û ketina kelehê gelekî dijwar e û wiha got: "Li vir ka mimariyeke çawa hatiye çêkirin aqil nagire. Lê cihê ku hêjayî ger û dîtinê ye."

Sergul Keskin ku ji navçeya Qaqizmana Qersê beşdarî geştê bû jî diyar kir ku ew bi dîtina Keleha Şeytan ku ji kelepûrên giring ên dîrokî û çandî yên herêmê ye bextewer bûye.

Keskin teqez kir ku derdora kelehê bi kendal û geliyên kûr hatiye dorpêçkirin û wiha axivî: "Ji ber ku her sê aliyên wê bi kendal hatine dorpêçkirin, dagîrkirin û fetihkirina kelehê gelekî dijwar e. Yek ji kelepûrên me yên dîrokî û çandî ye ku gihiştiye roja me ya îro û divê mirov biçe bibîne. Em herkesê li herêma me dawetî serdana vir dikin."

Elanur Sagsozê jî anî ziman ku bi dîtina Keleha Şeytan ku li ser medyaya civakî dîtibû, gelekî kêfxweş e.