24 Tîrmeh 2017•Rojanekirin: 25 Tîrmeh 2017
TBMM
Berdevkê HDPyê û Parlementerê Şanliurfayê Osman Baydemîr got, "Emê sibê komcivîna xwe li Diyarbekirê bikin. Bê tundî, bê kevir, bê dar emê bi temamî berxwedaneke wijdan û edaletê ku wê tê da tu enstrumanekî tundiyê tunebe, pêk bînin. Emê 7 rojan ji bo wijdan, demokrasî, wekhevî, azadî, edalet û aştiyeke birûmet li derva nobedê bigirin."
Baydemîr li Salona Civînê ya Rêvebirina Koma HDPyê civîna çapemeniyê li dar xist û diyar kir ku îro, salvegera rakirina sansurê ye û wiha xeberda, "Heger em ji hêla sansur, zext, mafê xeberstandin û mafê çapemeniyê yê xeberbelavkirinê va lê mêze bikin, îro di rastiyê da ne Cejna Çapemeniyê, cejneke reş e."
Baydemîr îdia kir ku Hevserokê Giştî yê HDPyê Selahettîn Demîrtaş û parlementerên HDPyê, 163 roj e wekî "rehîn hatine girtin" û îdiayên xwe wiha rêz kir, "Demîrtaş ji ber gotin û mixalefeta xwe di girtîgehê da ye. Tu dibê qey daraz ji bo ku ceza bide Demîrtaş, hatiye peywirdarkirin. Piştî derbeya 4ê Mijdarê der heqê hevserokê me da amadekirina îdianame û fezlekeyan didome. Ji 4ê Mijdarê vir da heya niha 16 fezlekeyên din jî hatin amadekirin."
Baydemîr ji fezlekeyên ku der heqê Demîrtaş da hatine amadekirin da nimûne parve kirin û herwiha got ku ew banga xwe ya bona Dadgeha Destûrê ya der heqê parlementerên girtî da dubare dikin û wiha got, "Edaleta derengmayî, ne edalet e û hûn xwedan li îçtihada xwe dernakevin û ev yek jî dibe sedema derengketina edaletê."
- Pirsyar
Ji bo pirsa rojnamegerekî ya "Gelo HDPyê pêvajoyeke çalakbûnê bide destpêkirin?", Baydemîr îdia kir ku siyaseta legal û demokratîk hat berterefkirin û wiha got, "Parlemento şixulê xwe nake û Parlemento kirine mîna notera partiya desthelat."
- "Emê li derva komcivînê bikin"
Baydemîr bal kişand ku ewê Komcivîna TBMMyê ya partiya xwe ya vê hefteyê li Diyarbekirê bikin û wiha pê da çû:
"Emê sibê komcivîna xwe li Diyarbekirê bikin. Bê tundî, bê kevir, bê dar emê bi temamî berxwedaneke wijdan û edaletê ku wê tê da tu enstrumanekî tundiyê tunebe, pêk bînin. Emê 7 rojan ji bo wijdan, demokrasî, wekhevî, azadî, edalet û aştiyeke birûmet li derva nobedê bigirin. Emê hefteya ewil li Diyarbekirê bin. Paşê hefteya duyemîn emê li Stenbolê bin. Piştra jî emê bi dorê li Wan û Îzmirê bin. Mehekê bênavber li çar herêman wê berxwedana wijdan û edaletê dewam bike."
