ئه‌ردۆغان: "ئیداره‌ی ئه‌مریكا گه‌لی فه‌ڵه‌ستین-ی سزا داوه‌"

ئیستانبوڵ - AA

سه‌ركۆماری توركیا ره‌جه‌ب ته‌یب ئه‌ردۆغان تیشكی خسته‌ سه‌ر ئه‌وه‌ی بڕیاری ئه‌مریكا بۆ ناساندنی قودس به‌ پایته‌ختی ئیسرائیل هیچ به‌هایه‌كی نییه‌، رایگه‌یاند: "ته‌نها بۆ خۆیان گه‌مه‌ ده‌كه‌ن. هه‌موو ئه‌و ئاكامانه‌ی به‌هۆی ئه‌و بڕیاره‌ ئیستیفزازیانه‌ بۆ پرۆسه‌ی ئاشتی ده‌كه‌ونه‌وه به‌ پله‌ی یه‌كه‌م ئه‌مریكا لێی به‌رپرسیاره‌. ئیداره‌ی ئه‌مریكا به‌مجۆره‌ سزای گه‌لی فه‌ڵه‌ستینی دا كه‌ چه‌ندین جار سه‌لماندوویانه‌ ئاشتییان ده‌وێت".

دوای كۆبوونه‌وه‌ی لووتكه‌ی نائاسایی رێكخراوی هاریكاری ئیسلامی له‌ هۆڵی كۆڕوكۆبوونه‌وه‌كانی ئیستانبوڵ سه‌ركۆماری توركیا ئه‌ردۆغان له‌گه‌ڵ سه‌رۆكوه‌زیرانی فه‌ڵه‌ستین رامی ئه‌لحه‌مدوڵڵا و سكرتێری گشتیی رێكخراوی هاریكاری ئیسلامی یوسف بن ئه‌حمه‌د ئه‌لئوسه‌یمین كۆنگره‌یه‌كی رۆژنامه‌وانییان ئه‌نجام دا.

ئه‌ردۆغان ئاماژه‌ی به‌وه‌ دا كه‌ كۆبوونه‌وه‌كه‌ ئێجگار گرنگ بووه‌ هه‌م له‌ نیشاندانی پشتیوانی بۆ گه‌لی فه‌ڵه‌ستین هه‌م له‌ ناردنی په‌یامی پێویست بۆ ئیسرائیل كه‌ كۆمه‌ڵكوژی غه‌ززه‌-ی ئه‌نجام داوه‌. سوپاسی هه‌موو ئه‌و كه‌سانه‌یشی كرد كه‌ هه‌ر زوو به‌ده‌م داواكه‌یه‌وه‌ هاتوون و به‌شداری لوتكه‌كه‌یان كرد و رۆڵیان هه‌بوو له‌ به‌ڕێوه‌چوونی لوتكه‌كه‌.

ئه‌ردۆغان سه‌رنجی بۆ ئه‌وه‌ راكێشا كه‌ ئیداره‌ی ئه‌مریكا وێڕای هه‌موو هۆشدارییه‌كان بڕیاره‌ نایاساییه‌كه‌ی له‌ ١٤ی ئایار خسته‌ واری جێبه‌جێكردن و ئاماژه‌ی به‌وه‌ دا كه‌ هه‌رگیزا و هه‌رگیز ئه‌وه‌ قبوڵ ناكه‌ن.

ئه‌ردۆغان جه‌ختی له‌وه‌ كرده‌وه‌ كه‌ وه‌ك چۆن سكرتێری گشتیی رێكخراوی هاریكاری ئیسلامی یوسف بن ئه‌حمه‌د ئه‌لئوسه‌یمین ئاماژه‌ی پێداوه‌ ئه‌و بڕیاره ئیسرائیل هیچ به‌هایه‌كی نییه، گوتی: "ته‌نها بۆ خۆیان گه‌مه‌ ده‌كه‌ن. هه‌موو ئه‌و ئاكامانه‌ی به‌هۆی ئه‌و بڕیاره‌ ئیستیفزازیانه‌ بۆ پرۆسه‌ی ئاشتی ده‌كه‌ونه‌وه به‌ پله‌ی یه‌كه‌م ئه‌مریكا لێی به‌رپرسیاره‌. ئیداره‌ی ئه‌مریكا به‌مجۆره‌ سزای گه‌لی فه‌ڵه‌ستینی دا كه‌ چه‌ندین جار سه‌لماندوویانه‌ ئاشتییان ده‌وێت. به‌م بڕیاره‌ ئیسرائیل خه‌ڵات كراوه‌ كه‌ نیشتیمانی گه‌لی فه‌ڵه‌ستینی داگیركردووه‌ و به‌ گه‌مارۆدان و دروستكردنی یه‌كه‌ی نیشته‌جێبوونی نایاسایی په‌یماننامه‌‌كانی چاره‌سه‌ركردنی كێشه‌كان له‌ رێگای دامه‌زراندنی دوو ده‌وڵه‌ته‌وه‌ پێشێل كردووه‌".