باران و تەرزە لە غازی عەنتاب کاریگەری نەرێنی لەسەر ژیان دروستکرد

غازی عەنتاب - AA

بارانبارینی بەخوڕ و تەرزە لە شاری غازی عەنتاب باشووری خۆرهه‌ڵاتی توركیا کاریگەری نەرێنی کردە سەر ژیانی هاووڵاتییان.

بەهۆی بارانبارینی بەخوڕ و تەرزەوە کە دوێنێ ئێوارە لە شارەکەدا دەستی پێ کرد، ئاو لە شەقام و کۆڵانەکاندا کۆبووەوە.

شۆفێران و پیادەکان بەهۆی گردبوونەوەی ئاو لە سەر رێگاکان و شەقامەکاندا دووچاری ئاستەنگی هاتوچۆ بوون.

بەهۆی تەرزەوە ئۆتۆمبێلەکان لە شارەکەدا سپیپۆش بوون، بەشێک لە هاووڵاتییان ئۆتۆمبێلەکانیان بە بەتانی و خێمە داپۆشت بۆ ئەوەی لە زیانەکانی تەرزە بیانپارێزن.

پێشبینی دەکرێت بە درێژایی شەو بارانبارین بەردەوام بێت.

هەروەها لە گەڕەکی کۆرکون سەر بە قەزای ئۆغوزەلی هەورەبروسکە لە تەویلەیەکی دا و لە ئەنجامدا چوار مەڕ مرداربوونەوە.