توركیا.. ژیانی ئایلانی سێ ساڵ دەکرێتە فیلمێکی سینەمایی

موغلا - AA

ژیانی ئایلانی تەمەن سێ ساڵان ئەو منداڵەی کە لە ئەنجامی ژێرئاوکەوتنی بەلەمێک لەکاتی تێپەربوونیان بە شێوەیەکی نایاسایی لە تورکیاوە بۆ یۆنان لەگەڵ خانەوادەکەی خنکا و تەرمەکەی لە کەناراوەکانی بۆدروم-ی سەر بە پارێزگای موغلای تورکیا دۆزرایەوە، دەکرێتە فیلم.

ئەو رووداوەی کە لە ساڵی ٢٠١٥ لە شارۆچکەی بۆدرومی تورکیا روویدا، بە بەشداری ھونەرمەندانی تورکیا و ئەستێرەکانی ھۆڵییوود دەکرێتە فلیمێکی سینەمایی.

تۆمارکردنی دیمەنەکانی ئەو فیلمە لە شوێنە جیاوازەکانی شارۆچکەی بۆدروم لە چەند رۆژێکی رابردوودا دەستیپێکرد و عومەر ساریكایا ئەرکی دەرھێنەریی گرتووەتە ئەستۆ.

ساریكایا لە لێدوانێکیدا بۆ ئاژانسی ئانادڵو رایگەیاند کە ئەوان نیازیان وابووە ساڵی رابردوو ئەو فیلمە بەرھەم بھێنن بەڵام نەیانتوانیووە و بڕیاریانداوە ئەمساڵ تۆماری بکەن.

عومەر ساریكایا ئاماژەی بەوەشدا کە ئامانجیان لەو فیلمەدا ئەوەیە کە کارەکەیان ببێتە په‌یامێکی گەورە بۆ پەنابەران و گوتیشی: "کاتێك ئەو رووداوە روویدا، ھیچ نەخەوتم. ھەمیشە لە بیرمدا بوو. ھاوکات بیرم لەوە دەکردەوە و بەخۆمم دەگوت ئینشائەڵڵا کەسێک ئەمە دەکاتە فیلمێک و پەیامێکی گەورە بە جیھان دەدات. بەڵام تا ئێستا ھیچ کەسێک ئەمەی نەکرد و بووە قسمەتی من".

ساریكایا ئاماژە بەوەشدا کە خۆی سیناریۆکەی نووسیووە و لە کاتی نووسینەوەش زۆر سۆزی جوڵاوە.

ئه‌و ده‌رهێنه‌ره‌ ئاماژەی بەوەشدا کە ئەمە تەنھا تەرمی منداڵێک نییە کە لە کەناراوەکان دۆزراوەتەوە بەڵکو ئابڕووچوونی جیھانە و ئاشکرایشی کرد کە پلانیان وایە تۆمارکردنی فیلیمەکە لە ٢٠ی تەمووز کۆتایی پێ بێت.

لەلایەکی دیکەش ھونەرمەندی سکۆتلەندی و ئه‌کتەری ھۆڵییوود، مایک میتچێل کە لە فیلمەکەدا رۆڵی گێراوە رایگەیاند کە ئەو فیلمە پەیامێکی گەورە بە جیھان دەدات لەبارەی پەنابەرانەوە.

لە پاڵ ژمارەیەک ئەستێرە و ئەکتەری جیھانی، ژمارەیەک ئەکتەری بەناوبانگی تورکیاش بەشداری ئەو فیلمە دەکەن.