سلێمانی..گردبوونەوەی دەرچووانی کۆلێجی پزیشکی ددان

سلێمانی-AA

لەپێناو گەیاندنی ناڕەزایی و داواکارییەکانیان بە حکوومەتی ھەرێمی کوردستان و دۆزینەوەی رێگەچارەی گونجاو بۆ دەرچووانی کۆلێجی پزیشکی ددان ( خولەکانی ٢٠١٥-٢٠١٩)، ژمارەیەک لە دەرچووانی کۆلێجی پزیشکی ددان گردبوونەوەیەکیان لە پارکی دایک لە سلێمانی ئەنجامدا.

دەرچووانی ئەو کۆلێجە پزیشکییە کە ژمارەیان زیاتر لە ١٠٠ کەس دەبوو، ھەوڵیاندا لەو رێگەیەوە پەیام و داواکانیان بەلایەنی بەرپرس لە حکوومەتی ھەرێم بگەیەنن تاوەکو لە دامەزراوە تەندروستییەکانی حکوومەت بخرێنە سەر کار.

بەشداربووانی گردبوونەوەکە داوایانکرد بۆ ماوەی رۆژێک نۆڕینگە تایبەتەکانی پزیشکی ددان دابخرێن وەک نیشاندانی ناڕەزایەتی بەرامبەر دانەمەزراندنی دەرچووانی ئەو بەشە.

نوێنەری دەرچووانی پزیشکی ددان، دەشنێ نەریمان لەلێدوانێکدا بۆ ئاژانسی ئانادۆڵو ئاماژەی کرد بەوەی کە نزیکەی ٧٥٠ دەرچووی پزیشکی ددان لە کۆلێجەکانی تەندروستی ددان لە ھەرسێ زانکۆکانی سلێمانی، ھەولێر، دھۆک تائێستا دانەمەزراون .

ئەو گوتی:" پێش چەند ساڵێک بەھۆی قەیرانی داراییەوە نەتوانرا پزیشکانی ددان دابمەزرێندرێن، بەڵام ئێستا ھیچ پاساوێک نەماوە بۆ دانەمەزراندنیان، ھەر بۆیە داوا لە وەزیری تەندروستی و حکوومەتی ھەرێمی کوردستان دەکەین کە ھەرچی زووە پرۆسەی دامەزراندنمان دەستپێبکات، لەکاتێکدا لەبری ئێمە کەسانی خۆبەش جێگیرکراون بۆ کارکردن" .