لێدوانی پنتاگۆن لەسەر دروستکردنی "ناوەندی جموجۆڵی ھاوبەش"

واشنتۆن - AA

وەزارەتی بەرگری ئەمریکا رایگەیاند کە ئەمریکا و تورکیا رێککەوتوون لەسەر پێکھێنانی "ناوەندی جموجۆڵی ھاوبەش" و قۆناغەکە ھەنگاو بە ھەنگاو جێبەجێ دەکرێ.

گوتەبێژی پنتاگۆن سین رۆبێرتسۆن لە وەڵامی پرسیارێکی نووسراوی ئاژانسی ئانادۆڵو ھەڵسەنگاندنی بۆ رێککەوتنی نێوان تورکیا و ئەمریکا لەسەر دروستکردنی ناوچەی ئارام لە سووریا کرد.

رۆبێرتسۆن رایگەیاند "لەمیانی کۆبوونەوە سەربازییەکانی ئەم ھەفتەیەی شاری ئەنقەرە، لێکتێگەیشتنی باش ھەبووە لەسەر دروستکردنی میکانیزمێکی ئەمنی لەگەڵ تورکیا کە ھاوپەیمانی ئێمەیە لە ناتۆ بە جۆرێک کە وەڵامی نیگەرانییە ئەمنییەکانی تورکیا دەداتەوە. ھەر بۆیەش بەمەبەستی بەردەوامی بە جێبەجێکردن و پلان دانان، ئامانجمان ئەوەیە کە بە ھاوبەشی تورکیا و ئەمریکا "ناوەندی جموجۆڵی ھاوبەش" لە تورکیا پێکبھێنین. ئەو میکانیزمە ئەمنییە ھەنگاو بە ھەنگاو جێبەجێ دەکرێ و بەردەوام دەبین لە تاوتوێکردن لەگەڵ تورکیا".

پێشتر وەزارەتی بەرگری تورکیا رایگەیاندبوو کە کۆبوونەوەی٥-٧ی ئابی بەرپرسانی وەزارەتی بەرگری تورکیا لەگەڵ بەرپرسانی سەربازی ئەمریکا لەسەر چاوپێککەوتنەکان بۆ بنیاتنانی ناوچەی ئارام لە باکووری سووریا کۆتایی ھات.

لە کۆبوونەوەکاندا رێککەوتن لەسەر ئەوەی کە لە قۆناغی یەکەمدا ئەو رێوشوێنانە بگیرێتە بەر کە نیگەرانییە ئەمنییەکانی تورکیا دەڕەوێنێتەوە، لەو چوارچێوەیەدا سەبارەت بە ناوچەی ئارام بە ھەماھەنگی لەگەڵ ئەمریکا رێککەوتن لەسەر بنیاتنانی ناوەندی ھاوبەشی بەڕێوەبردنی ناوچەی ئارام لە تورکیا بە زووترین کات.