پاپای ڤاتیکان داوا دەکات لە کەرتی غەززە ڕێز لە یاسای مرۆڤایەتی بگیرێت

جنێڤ – AA

پاپای کڵێسای کاسۆلیکی و سەرۆکی دەوڵەتی شاری ڤاتیکان، پاپا فرەنسیس ھانی ئیسرائیل و لایەنە فەڵەستینییەکانیدا کە لە کەرتی غەززە ڕێز لە یاسای مرۆڤایەتی بگرن.

پاپا فرەنسیس لە گوتارێکدا کە ئەمڕۆ یەکشەممە پێشکەشی کرد گوتی: "مرۆڤ دەبێ ڕێز لە مافەکان بگرێت، بە تایبەتی دەبێت رێڕەوەکانی مرۆیی گەرەنتیکراو بن بۆ گەیاندنی بەپەلەی یارمەتییە سەرەتاییەکان بۆ ھەموو خەڵکی غەززە".

ھەروەھا ھانی ئیسرائیل و لایەنە فەڵەستینییەکانیدا کە توندوتیژی و ڕشتنی "خوێنی بێتاوان" بوەستێنن و داوایشی کرد، ئەو کەسانەی کە لە میانی گرژییەکاندا، بە بارمتە گیراون، ئازاد بکرێن.

گوتیشی: "داوا دەکەم کە خەڵکی مەدەنی، بەتایبەتی منداڵان، بەساڵاچووان و ئافرەتان نەکرێنە قوربانی ململانێیەکان".

پاپای ڤاتیکان لە کۆتایی قسەکانیدا گوتی: "تکایە چیتر لە خاکە پیرۆزەکان، ئۆکراینا و ھیچ شوێنێکی دیکە، خوێنی بێتاوان مەڕێژن! بەسە! شەڕەکان ھەمیشە شکستن".