پێکدادان لە نێوان پێشمەرگە و حەشدی شەعبی

مووسڵ-AA

لە سنووری بەنداوی مووسڵ شەڕو پێکدادان لە نێوان هێزەکانی پێشمەرگە و حەشدی شەعبیدا روویدا و لە ئەنجامدا، نۆ کەس کوژران ١١ی دیکەش برینداربوون.

عەلی ئەکبەر خەفاجی بەرپرس لە دەزگای پۆلیسی ئیتیحادی بە پەیامنێری ئاژانسی ئانادۆڵوی راگەیاند لە نزیک بەنداوی مووسڵ هێزەکانی پێشمەرگە و حەشدی شەعبی داویانە بەیەکدا.

ئەمیش دوای ئەوە دێت کە پێشمەرگە رازی نەبووە بە کشانەوە لە بەنداوی مووسڵ و رادەستکردنی ناوچەکە بە حەشدی شەعبی، دواتر پێشمەرگەکان دەستیان کردووە بە تەقە کردن.

خەفاجی گوتی: "حەشدی شەعبیش وەڵامی هێزەکانی پێشمەرگەیان داوەتەوە و شەو سێ کاتژمێر شەڕو پێکدادان بەردەوام بووە و، هەشت کەس لە حەشدی شەعبی کوژراون و حەوتی دیکەش برینداربوون و پێشمەرگەیەکیش گیانی لەدەست داوە و چواری تریش برینداربوون".

ناوبراو ئاشکرای کرد کە پێکدادانەکان وەستاون و تا ئێستا هیچ کامە لە هێزەکان نەکشاونەتەوە.