عێراق
موقتەدا سەدر لە وەڵامی پرسیاری یەکێک لە شوێنکەوتووانی لە بارەی پێدانی سەرۆکایەتی دەستە سەربەخۆکانی عێراق لەلایەن سەرۆک وەزیرانی عێراقەوە بە کەسانێک بە وەکالەت، گوتی: "داوام لە برام عەبادی ئەوەیە بە چاوی بەرژەوەندی گشتی بڕوانێ و لە بڕیاری کارکردن بە وەکالەت پەشیمان ببێتەوە، چونکە چاوەڕوانم ئەو بە شوێن پێی ئەوی پێشوودا نەڕوات".
ئەم لێدوانەی رابەری رەوتی سەدر لەکاتێکدایە سەرۆک وەزیرانی عێراق پێشتر رایگەیاند، کە سەرۆکایەتی دەستەی حەج و عومرەی بە وەکالەت بە خالد عەتییە سەرکردەی دەوڵەتی یاسا سپاردوە و سەرۆکایەتی دەستەی دەستپاکی بە وەکالەت بە حەسەن نیعمە سپاردوە، ئەم هەنگاوەش کاردانەوەی زۆری لایەنە سیاسییەکانی عێراقی بە دوای خۆیداهێنا.
هاوکات سپاردنی پۆستی وەزیر و سەرۆکایەتی دەستە سەربەخۆکانی عێراق لە سەردەمی دەسەڵاتداری نووری مالیکی، سەرۆک وەزیرانی پێشووی عێراق یەکێک بوو لە ناکۆکییە هەرە زەقەکانی نێوان مالیکی و هاوبەشەکانی لە دەسەڵات.
هەروەها سەرۆک وەزیرانی عێراق لە وەڵامی ئەو رەخنانەی ئاڕاستەی بڕیارەکەی لە بارەی دەستە سەربەخۆکانەوە کران، رایگەیاند رێکنەکەوتنی فراکسیۆنە سیاسییەکان لەبارەی سەرۆکایەتی دەستە سەربەخۆکان بۆشاییەکی ترسناکی دروستکردووە و حکومەت ناتوانێ بەرژەوەندی وڵات رابگرێ لە چاوەڕوانی پێکهاتنی فراکسیۆنەکان.
