" ھۆکاری کێشەکانی عێراق ناوەڕۆکی دەستوور نییە"

ھەولێر - AA

ئەمڕۆ سێشەممە، سەرۆکی حکوومەتی ھەرێمی کوردستان، مەسرور بارزانی پێشوازی لە سەرۆک و ئەندامانی دەستەی بەڕێوەبەری ناوەندی دایەلۆگی رافیدەین کرد.

ماڵپەری حکوومەتی ھەرێمی کوردستان لەو بارەیەوە بڵاوی کردەوە، لە دیدارەکەدا گفتوگۆ دەربارەی گۆڕانکارییەکانی ئێستای عێراق کرا. جەخت لەوە کرایەوە کە ھەبوونی پەیوەندییەکی باش لە نێوان حکوومەتی ھەرێمی کوردستان و حکوومەتی فیدراڵی و گەشەپێدانی پەیوەندییەکان لە بەرژەوەندیی ھەموو خەڵکی عێراقدایە.

سەرۆکی حکوومەتی ھەرێمی کوردستان داوای لەشاندەکە کرد وەک دەستەبژێری رووناکبیری عێراق رۆڵی کاریگەری خۆیان لە یەک نزیککردنەوەی لایەنەکانی عێراق و داکۆکیکردن لە مافە دەستووریی و رەواکانی خەڵکی ھەرێمی کوردستان بگێڕن.

دەربارەی داواکانی گۆڕین یان ھەموارکردنی دەستووریش، سەرۆکی حکومەت روونیکردەوە کە "کێشەکانی عێراق ھۆکارەکەی ناوەڕۆکی دەستوور نییە بەڵکو جێبەجێ نەکردنی ماددەکانی دەستوورە". گوتیشی" ئێمە پشتگیریی لە ھیچ گۆڕانکاری و ھەموارکردنێکی دەستوور ناکەین کە دەستکاریی دەسەڵات و مافە دەستوورییەکانی ھەرێمی کوردستان بکات و کەمیان بکاتەوە".