نێچیرڤان بارزانی و بەرپرسى نووسینگەى هەماهەنگیى ئاسایشى ئەمریکا لە عێراق کۆبووەنه‌وە

هه‌ولێر-AA

نێچیرڤان بارزانی خۆشحاڵی بە کەشى ئەرێنێى پەیوەندیى نێوان هەرێمى کوردستان و حکوومەتى فیدرالى عیراق و گفتوگۆ بۆ چارەسەرکردنى کێشەکانى نێوان هەردوولا نیشان ده‌دات.

ئەمڕۆ سێشەممە لە هەولێر سه‌رۆكی هه‌رێمی كوردستان نێچیرڤان بارزانى و بەرپرسى نووسینگەى هەماهەنگیى ئاسایشى ئەمریکا لە عێراق گریگۆرى کوودەر كۆبوونه‌وه‌.

بە پێی ئەم هەواڵە، دوو لایەن دۆخى ئاسایشى ناوچە کێشە لەسەرەکانى نێوان هەرێمى کوردستان و حکوومەتى فیدرالى عێراقیان تاوتوێ کرد، بەتایبەتى تیشکیان خستە سەر دۆخى پارێزگاى کەرکووک و دەوروبەرى و ناوچەى شنگال و دەشتى نەینەوا، هەروەها جەختیان لە پاراستنى ئاسایش و سەقامگیرى لە تەواوى عێراق کردەوە.

سەرۆکى هەرێمى کوردستان، ستایش و پێزانینى هەرێمى کوردستانى بۆ یارمەتى و پشتگیریى ئەمریکاى لە هەرێمى کوردستان بۆ تێکشکاندنى داعش دووپات کردەوە و بەردەوامیى بەشداریى ئەمریکاى لە پرۆسەى یەکخستنى پێشمەرگە و چاکسازى لە وەزارەتى پێشمەرگە بە پێویست زانى و سوپاسى ئەو هاوکارى و یارمەتییەى کرد کە تا ئێستا لەمبارەیەوە پێشکەشى کردووە.

لە کۆبوونەوەکەدا كه‌ کونسولى گشتیى ئەمریکا لە هەرێمى کوردستان و شاندێکى سەربازیش تیایدا بەشدار بوون، بەرپرسى نووسینگەى هەماهەنگیى ئاسایشى ئەمریکا لە عێراق ستایشى ڕۆڵى پێشمەرگەى لە شەڕى دژى تیرۆر کرد و بەردەوامیى پشتگیریى وڵاتەکەی بۆ پێشمەرگە و هەرێمى کوردستان نیشان داوە و جەختى لە ڕۆڵى سەرۆکایەتیى هەرێمى کوردستان و پشتگیرى لە هەوڵەکانى حکوومەتى هەرێمى کوردستان بۆ یەکخستنى پێشمەرگە و پڕۆسەى چاکسازى لە وەزارەتى پێشمەرگە کردووەتەوە.