دادگه‌ی فیدراڵی: "مادده‌ی 140 به‌رده‌وامه‌"

هه‌ولێر - AA
دادگه‌ی باڵای فیدراڵی عێراق ده‌ڵێت جێبه‌جێنه‌كردنی مادده‌ی 140 له‌ كرۆكی مادده‌كه‌ كه‌م ناكاته‌وه‌.
گوته‌بێژ به‌ناوی دادگه‌ی باڵای فیدراڵی عێراق، ئه‌یاس ساموك له‌ راگه‌یه‌نراوێكدا ئه‌وه‌ی راگه‌یاندووه‌ كه‌ دادگه‌كه‌ كۆبوونه‌وه‌ی ئاسایی خۆی به‌سه‌رۆكایه‌تی دادوه‌ر مه‌دحه‌ت مه‌حمود و ئاماده‌بوونی سه‌رجه‌م دادوه‌رانی ئه‌ندام ئه‌نجامداوه‌ و ته‌ماشای داوایه‌كی ئه‌نجوومه‌نی نوێنه‌رانی كردووه‌ بۆ شیكردنه‌وه‌ی مادده‌ی 140 له‌ ده‌ستوور و به‌رده‌وامبوونی یان به‌رده‌وام نەبوونی كرد".
ساموك ئه‌وه‌شی گوت "دادگه‌ی باڵای فیدراڵی وای ده‌بینێت كه‌ مادده‌ی 140 له‌ ده‌ستووری كۆماری عێراق بۆ ساڵی 2005 جێبه‌جێكردنی ده‌كه‌وێته‌ ئه‌ستۆی ده‌سه‌ڵاتی جێبه‌جێكردن بۆ هه‌ڵبڕینی ئه‌و هه‌نگاوانه‌ی كه‌ پێویستن بۆ جێبه‌جێكردنی كه‌ پێشتر مادده‌ی 58 بووه‌ له‌ یاسای به‌ڕێوه‌بردنی ده‌وڵه‌ت له‌ قۆناغی راگوزه‌ری، بۆیه‌ هێشتا ئه‌و مادده‌یه‌ به‌رده‌وامیی هه‌یه‌".
ئەو گوتیشی: "دادگه‌ی باڵای فیدراڵی وای ده‌بینێت كه‌ ئه‌و هه‌نگاوانه‌ی مادده‌ی 58 له‌ یاسای به‌ڕێوه‌بردنی ده‌وڵه‌ت له‌ قۆناغی راگوزه‌ری ته‌واونه‌كراوه‌ و به‌شێكی جێبه‌جێ نه‌كراوه‌، بۆیه‌ ئامانج له‌ دانان و داڕشتنی مادده‌ی 140 له‌ده‌ستووری عێراق پێویسته‌ و ده‌بێت هه‌مووان جێبه‌جێی بكه‌ن".
گوته‌بێژی فه‌رمی دادگه‌ی باڵای فیدراڵی ئه‌وه‌شی دركاندووه‌ كه‌ دادگه‌ ئه‌وه‌ی روونكردووه‌ته‌وه‌ ئه‌و ماوه‌یه‌ی بۆ جێبه‌جێكردنی مادده‌ی 140 دیاریكرابوو بۆ كاروباری رێكخستن دانرابوو، جێبه‌جێ نه‌كردنیشی له‌و كاتانه‌ هیچ زیان به‌ جه‌وهه‌ری مادده‌كه‌ و به‌جێ گه‌یاندنی ئامانجه‌كه‌ی ناكات"، هه‌ر به‌و بۆنه‌یه‌شه‌وه‌ بڕیار دراوه‌ كه‌ مادده‌كه‌ به‌رده‌وام بێت تا جێبه‌جێكردنی.
مادده‌ی 140 له‌ ده‌ستووری هه‌میشه‌یی عێراق بۆ ساڵی 2005 باس له‌ نه‌هێشتنی سیاسه‌ته‌كانی گۆڕینی دیمۆگرافیا كه‌ له‌ لایه‌ن رژێمی پێشووی عێراقه‌وه‌ جێبه‌جێ په‌یڕه‌ویی لێ ده‌كرا، ده‌كات، ده‌بوو ئه‌و مادده‌یه‌ كه‌ سێ قۆناغ له‌خۆ ده‌گرێت جێبه‌جێ بكرێت، به‌ڵام ناكۆكیی پێكهاته‌كانی كورد، عه‌ره‌ب و توركمان ئه‌و مه‌سه‌له‌ی دواخست و مادده‌كه‌ هێشتا جێبه‌جێ نه‌كراوه‌.