سەرۆکوەزیرانی عێراق ئێوارەخوانێکی لەسەر شەرەفی میری قەتەر رێکخست

هەولێر - AA

سەرۆکوەزیرانی عێراق، محەمەد شیاع سوودانی، ئێوارەخوانێکی رێزلێنانی بۆ میری قەتەر، تەمیم بن حەمەد ئاڵ سانی رێکخست.

نووسینگەی راگەیاندنی سەرۆکوەزیرانی عێراق بڵاوی کردەوە، هەریەک لە سەرۆکی ئەنجوومەنی نوێنەرانی عێراق، محەمەد حەلبووسی و سەرۆکی هەرێمی کوردستان، نێچیرڤان بارزانی و سەرۆکی هاوپەیمانی سەروەریی، خەمیس خەنجەر و هەردوو شاندی قەتەر وعێراق ئامادەی ئێوارەخوانەکە بوون.

ئێوارەی ئەمڕۆ پێنجشەممە، میری قەتەر، تەمیم بن حەمەد ئال بە سەرۆکایەتی شاندێکی باڵای وڵاتەکەی گەیشتە بەغدا و لەلایەن سەرۆکوەزیرانی عێراق، محەمەد شیاع سوودانی پێشوازیی لێکرا.

دوای کۆبوونەوەی دووقۆڵی و کۆبوونەوەی نێوان شاندەکان، یاداشتنامەیەکی لێکتێگەیشتن لەنێوان عێراق و قەتەر واژووکرا کە چەندین بوار لەخۆدەگرێت هاوکات واژوو لەسەر رێککەوتنێک سەبارەت بە هەڵگرتنی ڤیزای چوونەژوورەوەی هەڵگرانی پاسپۆرتی دیپلۆماتی لە نێوان عێراق و قەتەر کرا.

دواتر کۆنگرەیەکی رۆژنامەوانیی هاوبەش بۆ سەرۆکوەزیرانی عێراق، محەمەد شیاع سوودانی و میری قەتەر، تەمیم بن حەمەد ئاڵ سانی سازکرا.