عێراق پێنج فڕۆكه‌ی شه‌ڕكه‌ی دیكه‌ی وه‌رگرت

هه‌ولێر-AA

سه‌ركرده‌ی هێزی ئاسمانیی عێراق فه‌ریقی فڕۆكه‌وان ئه‌نور حه‌مه‌ ئه‌مین ده‌ڵێت چه‌كی ئاسمانیی عێراق پێشكه‌وتنێكی زۆری به‌خۆیه‌وه‌ بینیوه‌ له‌سه‌ر ئاستی جه‌نگی و مه‌شق و راهێنانیش.

دوێنێ هه‌ینی پێنج فڕۆكه‌ی جه‌نگیی F16 وه‌كو دوایین به‌شی ئه‌و فڕۆكانه‌ی به‌پێی رێككه‌وتنی نێوان عێراق و ئه‌مریكا واژوو كرابوو گه‌یشته‌ عێراق و له‌ بنكه‌ی ئاسمانیی به‌له‌د له‌ نزیك به‌غدا گیرسایه‌وه‌.

سه‌ركرده‌ی هێزی ئاسمانیی عێراق فه‌ریقی فڕۆكه‌وان ئه‌نور حه‌مه‌ ئه‌مین له‌وباره‌یه‌وه‌ رایگه‌یاند "ئه‌مڕۆ زۆر دڵخۆشین به‌ گه‌یشتنی وه‌جبه‌یه‌كی دیكه‌ له‌و فڕۆكانه‌ی كه‌ پێش چه‌ند ساڵێك رێككه‌وتنییان بۆ واژوو كرابوو و هێزی ئاسمانی عێراق خه‌ریكه‌ ده‌كه‌وێته‌وه‌ سه‌ر پێی خۆی و ئێستا زۆر پێشكه‌وتووه‌ له‌ چوارچێوه‌ی بونیادنانه‌وه‌ی هێزی ئاسمانی عێراق".

عێراق و ویلایه‌ته‌ یه‌كگرتووه‌كانی ئه‌مریكا له‌ ساڵی 2011 گه‌یشتنه‌ رێككه‌وتن بۆ ئه‌وه‌ی عێراق 36 فڕۆكه‌ی F16 له‌ ئه‌مریكا بكڕیت كه‌ یه‌كێكه‌ له‌و فڕۆكه‌ جه‌نگییانه‌ی زۆر كاریگه‌ریی له‌سه‌ر به‌هێزكردنی توانای شه‌ڕكردنی عێراق ده‌بینێت به‌تایبه‌ت له‌ ئاسمانه‌وه‌.

به‌پێی زانیارییه‌كان به‌های ئه‌و گرێبه‌سته‌ 4 ملیار و 500 ملیۆن دۆلار بووه‌، واته‌ نرخی هه‌ر فڕۆكه‌یه‌كی له‌و جۆره‌ 64 ملیۆن دۆلاره‌.