محەمەد حەلبووسی: " دادگای باڵای فیدراڵی ئەرکی خۆی لە پاراستنی دەستوور ڕەچاو نەکردووە"

ھەولێر – AA

سەرۆکی پارتی تەقەدووم، محەمەد حەلبووسی ڕایگەیاند کە ئەرکی دادگای باڵای فیدراڵی عێراق، تایبەتە بە پاراستنی دەستوور، بەڵام دادگاکە ئەوەی رەچاو نەکردووە.

محەمەد حەلبوسی کە دوێنێ سێشەممە بە بڕیاری دادگای باڵای فیدراڵیی عێراق ئەندامێتی لە ئەنجوومەنی نوێنەران ھەڵوەشێندرایەوە لە کۆنگرەیەکی ڕۆژنامەوانییدا ڕایگەیاند کە ئەرکی دادگای باڵای فیدراڵی تایبەتە بە چاودێریکردن و پاراستنی دەقەکانی دەستوور، بەڵام دادگاکە ئەوەی ڕەچاو نەکردووە.

ئاماژەی بەوەیشدا کە بەپێی ماددەی ٤٩ی دەستوور و بەپێی یاسای ھەڵبژاردنەکان، بڕیارەکەی دادگای باڵای فیدراڵی لەبارەی ھەڵوەشاندنەوەی ئەندامێتی لە ئەنجوومەنی نوێنەران، یاسایی نییە و گوتی: "پێویستە سەرجەم لایەنەکان پابەندی دەستووربن، بە پێچەوانەوە ئەگەر یاسا سەروەر نەبێت، ئەوە گەل و وڵات زیانیان بەردەکەوێت".

گوتیشی: "بەپێی دەستوور و یاسای ھەڵبژاردنەکان، تەنھا سەرۆکی ئەنجوومەنی نوێنەران، دەسەڵاتی ھەیە، ئەندامێتی ئەندامانی ئەنجوومەنی نوێنەران ھەڵبوەشێنێتەوە، دادگا تەنھا دەسەڵاتی ئەوەی ھەیە لەسەر تاوان، بڕیار لەسەر ئەندامانی ئەنجوومەنی نوێنەران دەر بکەن، دادگا دەسەڵاتی ئەوەی نییە ئەندامێتی ئەندامانی ئەنجوومەنی نوێنەران ھەڵبوەشێنێتەوە".

محەمەد حەلبووسی ڕوونیشی کردەوە: "بەپێی ماددەی ٥٢ی دەستوور، دادگای باڵای فیدراڵی بۆی ھەیە بەدواداچوون بکات، ئەویش لە سەر ڕاست و دروستی ئەندامێتی ئەندامانی ئەنجوومەنی نوێنەران و گوتی: "ئەو پرسە پەیوەست نییە بە محەمەد حەلبووسی، بەڵکو پەیوەستە بە دەسەڵاتی یاسادانان".

دوێنێ سێشەممە، دادگای باڵای فیدراڵیی عێراق، ئەندامێتی سەرۆکی ئەنجوومەنی نوێنەران، محەمەد حەلبووسی لە ئەنجوومەنەکە ھەڵوەشاندەوە.

وەک کاردانەوەیەک دژ بەو بڕیارەی دادگای باڵای فیدراڵی نوێنەرانی پارتی تەقەدووم کە محەمەد حەلبوسی سەرکردایەتی دەکات لە حکوومەتی عێراق کە بریتیین لە جێگری سەرۆکوەزیران و وەزیری پلاندانان، محەمەد عەلی تەمیم و وەزیری پیشەسازی و کانزاکان، خالید بەتال نەجم و وەزیری رۆشنبیری، ئەحمەد فەکاک بەدرانی، دەستیان لەکارکێشایەوە.