نێچیرڤان بارزانی و میر حازم تەحسین بەگ دۆخی ناوچەی شنگالیان تاوتوێ کرد

ھەولێر ــ AA

سەرۆکی ھەرێمی کوردستان-عێراق، نێچیرڤان بارزانی پشتگیری خۆی بۆ تەواوی مافەکانی ئێزدییان دووپات کردەوە.

سەرۆکایەتی ھەرێم لە ڕاگەیاندراوێکدا ئاماژەی بەوەداوە کە نێچیرڤان بارزانی پێشوازی کردووە لە میری ئێزدییان لە هەرێمی کوردستان، عێراق و جیھان، میر حازم تەحسین بەگ.

ڕاشیگەیاندووە کە لە دیدارەکەدا، نێچیرڤان بارزانی، پشتگیریی خۆی بۆ تەواوی مافەکانی ئێزدییان دووپات کردووەتەوە.

ئەوەشی خستووەتەڕوو کە ھەر لە لە دیدارەکەدا، ھەردوولا بیروڕایان لەبارەی دۆخی ئێزدییان و مافەکانیان لە ھەرێمی کوردستان و عێراق ئاڵوگۆڕ کردووە و جەختیان کردووەتەوە لە پێویستی خزمەتکردنی باشتری‌ ھاووڵاتییانی ئێزدی لە ھەموو ڕوویەکەوە.

باسی لەوەشکردووە کە لە تەوەرێکی دیدارەکەدا، گفتوگۆکراوە لەبارەی دۆخی ناوچەی شنگال، ئاوارە ئێزدییەکان و ژیان و گوزەرانیان لە کەمپەکاندا.