Haydar Karaalp
10 شوبات 2022•نوێکردنەوە: 10 شوبات 2022
بەغدا - AA
وەزیری کارەبای عێراق بە وەکالەت، عادل کەریم، ئەوەی راگەیاند کە بۆ چارەسەرکردنی کێشەی کارەبا، بهم نزیکانە بڕی ٥٠٠ مێگاوات کارەبا لە تورکیا دەکڕن.
عادل کەریم لە میانی بەشداریکردنی لە پرۆگرامێکی تەلەڤیزیۆنی فەرمیی عێراق، چەند روونکردنەوەیەکی سەبارەت بە پچرانی کارەبا لە وڵاتەکە دا.
باسی لەوە کرد کە گفتوگۆكانیان بۆ کرینی گاز لە قەتەر بە مەبەستی پێدانی کارەبای زیاتر بۆ عێراق بەردەوامە و گوتی: "ئەگەر تواناکان بەردەستبن، لە ماوەی ساڵێک بۆ ١٥ مانگ بابەتی کڕینی گاز لە قەتەر کۆتایی پێدێت".
وەزیری کارەبای عێراق بە وەکالەت ئاماژەی بەوەش کرد کە رێککەوتنی وزە (کارەبا)یان لەگەڵ سعوودیە واژوو کردووە و باسی لهوهكرد، ئەو ھێڵی وزەیەی کە لە سعوودیەوە دێت دەخرێتە سەر ھێڵی وزەی عەرعەر- یوسفییە و رایگهیاند: "لە قۆناغی یەکەمدا ٥٠٠ مێگاوات کارەبا لە سعوودیه دەکڕین و دواتر ئەم بڕە بۆ ھەزار مێگاوات بەرزدەبێتەوە".
عادل کەریم ئەوەشی خستەڕوو کە ھێڵی کارەبا لەگەڵ ئوردن لە ماوەی ساڵێکدا تەواو دەبێت و باسی لەوە کرد کە ئەو کارەبایەی لەو وڵاتە دەکڕدرێت دەدرێتە ناوچەکانی رۆژئاوای عێراق.
ئەوەشی ئاشکرا کرد کە بۆ چارەسەرکردنی کەمیی کارەبا پاڵپشتی لە تورکیاش وەردەگرن و گوتی: "بهم نزیکانە ٥٠٠ مێگاوات کارەبا لە تورکیاوە ھاوەردە دەکەین".
- کەمیی گازی ئێرانی پچرانی کارەبا زیاد دەکات
عادل کەریم، ئەوەشی روونکردەوە کە لە ئێستادا ھەشت ملیۆن مەترسێجا گاز لە ئێرانەوە ھاوردە دەکەن و ئەو بڕەش بەشی بەرھەمھێنانی کارەبا ناکات و گوتی:
"بهم نزیکانە بە مەبەستی چارەسەرکردنی کێشەی ئەو گازەی کە لە ئێرانەوە دێت شاندێک لە وەزارەتەوە دەچن بۆ تاران. عێراق، یەک ملیار و ٦٩٢ ملیۆن دۆلار قەرزاری ئێرانە. تێچووی ساڵانەی گازی ئێران لەسەر عێراق لە چوار ملیار دۆلار کەمترە. ھاوینی رابردوو تەنانەت یەک مێگاوات کارەبامان لە ئێرانەوە وەرنەگرت".
