چالاکی ھونەری تایبەت بە یادی ٢٣٥ ساڵەی بنیاتنانی سلێمانی

سلێمانی ـ AA

لە مۆزەخانەی سەرا لە شاری سلێمانی و لەچوارچێوەی چالاکییەکانی تایبەت بە یادی ٢٣٥ ساڵەی بنیاتنانی سلێمانی، چەند چالاکییەکی ھونەری تایبەت ئەنجامدران.

چالاکییەکان لەلایەن بەشی چالاکی و پڕۆژەکانی کۆڕی کەلەپووری کەلتووری سەر بە گرووپی توێژینەوەی کەلەپووری کەلتووری دیجیتاڵی لە زانکۆی پۆلیتەکنیکی سلێمانی بە ھاوبەشی لەگەڵ ماڵی کەلتوور و کەلەپووری سۆفی کەریم سەراج و سەنتەری رۆشنبینری و کۆمەڵایەتی بابان و کۆمەڵەی ھونەری میللی کوردستان و سەنتەری رۆشنبیری سەرا و ناوەندی چاپەمەنی و راگەیاندنی خاک بەڕێوەچوو.

لەبەشێکی تری چالاکییەکاندا پێشانگای شێوەکاریی ھونەرمەند، تەیب بابان و پڕۆژە جیاجیاکانی تایبەت بە دەستنیشان کردنی شاری سلێمانی لەنێو لیستی داھێنەرانی بواری ئەدەبی رێکخراوی یونسکۆ، کرانەوە.