سلێمانى.. چالاکییەکانى ساڵیادى شنگال

ئەندامى دەستەى ژنانى شنگال لە شارى سلێمانى رووناک محەممەد بە ئاژانسى ئانادۆڵوى راگەیاند "ئێمە وەک دەستەیەک لە ژنانى رێکخراوەکانى شارى سلێمانى وەک یادکردنەوەى ساڵیادى کۆمەڵکوژى قەزاى شنگال هەستاین بە ئەنجامدانى ئەم مەراسیمە و بڕیارمان داوە هەر بەو بۆنەیەوە چەندین چالاکى تر ئەنجام بدەین".
ئەو گوتیشى "ئێمە وەک ژنان بڕیارمان داوە سبەینێ پێنجشەممە بەشێک لە ژنانى سلێمانى و کوردستان سەردانى چیایى شنگال دەکەین وەک پاڵپشتییەک و رێزێک بۆ ژنانى شنگال".
رووناک ئاماژەى بۆ ئەوەشکرد، "ئێمە وەک خۆمان دوو یاداشتمان ئاراستەى نەتەوە یەکگرتووەکان هەروەها پەرلەمانى عێراق و پەرلەمانى کوردستان کردووە بۆئەوەى کاربکرێت بۆ بەجینۆساید ناساندنى کۆمەڵکوژى شنگال و هەوڵ بدرێت قەرەبووى ماددى و مەعنەوى ئەو قەزایە بکرێتەوە".
مامۆستایانى ئاینیش لە شارى سلێمانی هاوخەمى خۆیان بۆ ساڵیادى تاوانى کۆمەڵکوژى شنگال دووپات کردەوە و رایانگەیاند "ئەو کارانەى کە کراون بەرامبەر شنگالییەکان بۆ بەرژەوەندى و هەروەها بۆ ناشرینکردنى ئایینى ئیسلامە".
مامۆستاى ئایینى نادر عەلى بە ئاژانسى ئانادۆڵوى راگەیاند "وەک مامۆستایانى ئاینى هاوخەمى خۆمان بۆ ئەو تاوانە دەردەبین کە دووساڵ لەمەوبەر لەلایەن چەکدارانى داعشەوە ئەو قەزایە خاپوورکراوە و کچ و منداڵى خێزانە شنگالییەکانیان دەست بەسەر کردو بەتوندى هێرشیانکردە سەریان".
گوتیشى "ئەو کۆمەڵکوژییەى کە دووساڵ لەمەوبەر کراوە لەلایەن ئاینى پیرۆزى ئیسلامەوە رێگە پێنەدراوە چونکە ئایینى پیرۆزى ئیسلام ئاینێکى پاک و بێگەردە باسى تەبایى نەتەوەکان دەکات".
ئەو مامۆستایە راشیگەیاند "ئەو کارانەى کە کراون بەرامبەر شنگالییەکان بۆ بەرژەوەندى و هەروەها بۆ ناشرینکردنى ئایینى ئیسلامە".
هەر بەبۆنەى ساڵیادى کۆمەڵکوژى شنگالەوە لەکەمپى ئاشتى لە ناحیەى عەربەت چالاکییەک بەڕێوەچوو کە تیایدا باسى ئەو کۆمەڵکوژییە کرا کە بەسەر ئەو خێزانانەدا هاتووە لە قەزاى شنگال".