БиХ: Пожарот во Домот за пензионери во Тузла ја зеде 13. жртва

САРАЕВО (АА) - Уште едно лице хоспитализирано на Клиниката за анестезиологија и реанимација во Универзитетскиот клинички центар Тузла, во Босна и Херцеговина, почина по пожарот во Домот за пензионери во Тузла, со што бројот на жртви се искачи на 13, за Анадолу потврди Ерсија Ашчериќ-Мујединовиќ, портпаролка на Универзитетскиот клинички центар во Тузла, јавува Анадолу.

„Синоќа во 23:01 часот почина уште едно лице“, рече таа.

Ашчериќ-Мујединовиќ истакна дека во моментов 13 лица се хоспитализирани во Универзитетскиот клинички центар во Тузла. Во моментов на Клиниката за анестезиологија и реанимација има тројца пациенти, а еден од нив е на респиратор.

Голем пожар избувна во вторникот околу 20:45 часот на седмиот кат во Домот за пензионери во Тузла.

Според прелиминарните информации, пожарот избувнал на катот каде што биле сместени неподвижните штитеници, што значително ја отежнало евакуацијата. Сведоците од местото на настанот изјавија дека кратко по избувнувањето на пожарот се почувствувал густ чад и во објектот завладеала паника.

Вчера беше Ден на жалост во Федерацијата БиХ и Округот Брчко. Градот Тузла прогласи четиридневна жалост почнувајќи од вчера. Вчера беше и Ден на жалост во Црна Гора.