„ЕУ во октомври да донесе одлука за отворање на пристапните преговори со Северна Македонија"

СКОПЈЕ (АА) - Премиерите на државите на Вишеградската група, на денешната средба со претседателите на владите на земјите од Западен Балкан, на која учествува и премиерот на Северна Македонија Зоран Заев, денеска во Прага ја усвоија Декларацијата на Вишеградската група за Западен Балкан, во која ја повикаа Европската унија (ЕУ) на октомвриската сесија на Советот за општи работи да донесат одлука за отворање на пристапните преговори со Северна Македонија и со Албанија, пренесува Anadolu Agency (AA).

Како што соопшти Владата на Република Северна Македоија, во Декларацијата, лидерите од Вишеградската група ја потврдуваат нивната недвосмислена поддршка за пристапувањето на државите од Западен Балкан во Европската Унија и увереноста дека обединувањето на Европа нема да биде целосно без пристапувањето на Западен Балкан во Европската Унија.

„Во текстот на Декларацијата се нагласува дека политиката на проширување на Европската Унија е значајна алатка со непроценлива вредност за постигнување безбедност, стабилност и просперитет во Западниот Балкан; оттаму, постоењето на кредибилна политика за проширување претставува стратешка инвестиција за безбедноста, стабилноста и просперитетот и на Европската Унија“, се вели во соопштението и се наведува:

„Во овој документ на Вишеградската група се напоменува дека пристапувањето е и ќе остане процес заснован на заслуги, кој целосно зависи од објективно постигнатиот напредок, и се повикуваат сите засегнати страни во Европската Унија, а во однос на октомврискиот Совет за општи работи, да го задржат и зајакнат позитивниот импулс и енергијата која произлезе од напредокот во реформите и од стапувањето во сила на историскиот Преспански договор, преку отворање на пристапните преговори со Северна Македонија и со Албанија.“

Декларацијата на Вишеградската група нагласува дека започнувањето на пристапните преговори во октомври 2019 година не само што ќе овозможи двете држави да се посветат уште повеќе на потребните реформи, туку ќе служи како значаен поттик за целиот регион и гаранција дека Европската Унија ќе продолжи да има водечка улога во позитивната трансформација на регионот.

„Премиерите на земјите членки на Вишеградската група, во Декларацијата изразуваат очекувања, во согласност со Стратегијата на Европската комисија за Западен Балкан од февруари 2018 година, дека пристапните преговори со Србија и Црна Гора ќе бидат забрзани во текот на следниот мандат на Комисијата, во согласност со напредокот постигнат од двете држави, како и тоа дека реформските процеси во Босна и Херцеговина и Косово во натамошниот период ќе ги зајакнат шансите за членство во Европската Унија на регионот“, се вели во Декларацијата.

Во Декларацијата од Прага се повторува поддршката за државите партнери од Западен Балкан во нивната подготвеност за одржување на стабилноста во регионот, зајакнување на владеењето на правото, борбата со организираниот криминал и корупцијата, зајакнувањето на отпорноста кон хибридните закани, спречување на радикализацијата и контрола на миграцијата.

„Земјите членки од Вишеград во Декларацијата нагласуваат дека ја имаат предвид стратешката улога на Западен Балкан во зајакнувањето на диверзификацијата на енергетските извори на Европската Унија преку Јужниот коридор и ја изразија својата подготвеност за подобрување на соработката помеѓу државите од Вишеградската група и Западен Балкан“, се наведува во Декларацијата.

Во завршницата на Декларацијата на Вишеградската група се потенцира подготвеноста на државите од Вишеградската група за натамошна поддршка за широка регионална соработка, добрососедски односи и помирување на Западниот Балкан, меѓу другото, и преку грантови на Меѓународниот вишеградски фонд, програми за стипендирање или помош за Фондот за Западен Балкан.

Земји членки на Вишеградската група се четирите средноевропски држави Унгарија, Полска, Словачка и Чешка.