„На денот на изборите во Црна Гора планирани нереди“

ПОДГОРИЦА (АА) - Директорот на Управата на полицијата на Црна Гора, Веселин Вељовиќ, предупреди дека на денот на изборите во земјата се планираат инциденти и немири, јавува Агенција Анадолија (AA).

Тој рече дека полицијата има оперативни податоци дека поединци и групи планираат да предизвикаат инциденти и немири на денот на парламентарните избори.

„Нашите сознанија укажуваат на тоа дека овие луѓе преку социјалните мрежи и други канали повикуваат за време на гласањето и по затворањето на избирачките места граѓаните да излезат на улиците, да предизвикуваат немири и да го нарушуваат јавниот ред“, додаде тој.

Вељовиќ предупреди дека полицијата во сите градови ќе постапува одлучно и одговорно, и дека сите лица кои ќе предизвикуваат немири ќе одговараат пред законот.

„Оние кои ќе покажат деструктивно и екстремно однесување, кои ќе предизвикаат граѓанска нестабилност и ќе ги прекршат законските прописи, ќе бидат спречени и ќе сносат одговорност. Ги повикувам граѓаните сите заедно да ја споделиме одговорноста и да ги сочуваме граѓанските и цивилизациските вредности на општествената заедница како заедничко добро и интерес на секој поединец и семејство“, апелира Вељовиќ.

Во Црна Гора на 30 август ќе се одржат парламентарни и локални избори во Будва, Котор, Тиват, Андријевица и Гусиње.