Изгореа 800 хектари зелени површини во Хрватска, 500 пожарникари се на терен

СПЛИТ (АА) - Пожарите во Далмација ги гаснат 500 пожарникари, а досега изгореа повеќе од 800 хектари зелени површини, јавува Анадолу.

Хрватските пожарникари продолжуваат да се борат со два големи пожари во Далмација, во Тучепи кај Макарска и во Врсине кај Трогир.

Главниот командант на пожарникарите Славко Туцаковиќ изјави дека во два пожари изгореле повеќе од 800 хектари трева, грмушки и борова шума, а околу 500 пожарникари од сите делови на земјата се борат со пламените јазици.

Пожарникарите сѐ уште се обидуваат да го локализираат пожарот кој се шири од Биоково за да не стигне до Тучеп. Се стравува дека ветерот југо ќе го распламти огнот и ќе создаде нови проблеми.

Во Тучепи пожарот го гаснат 320 пожарникари со 77 противпожарни возила кои се соочени со тешко пристапен терен. Во четвртокот во гаснењето на пожарот помагаа и два канадери.

Пожарот во Тучепи избувна во вторникот, а во средата вечерта се проширил кон населбата Подгора. Пламените јазици биле високи и до 30 метри, а пожарот дошол на 20 метри од куќите, па неколку туристи биле евакуирани, додека мештаните останале во своите домови.

Изгоре и дел од паркот Биоково каде има шуми од автохтон далматински црн бор.