Курти бара да се испита уставноста на тајниот договор на Тачи со НАТО во врска со заминувањето на КБС на северот

ПРИШТИНА (AA) - Премиерот на Косово, Албин Куртин, со официјално писмо ја извести претседателката на Собранието на Косово, Вјоса Османи, за можно кршење на Уставот од страна на претседателот на Косово, Хашим Тачи, бидејќи во 2013 година, како премиер на земјата потпишал договор со НАТО со кој на КФОР му е пренесено апсолутно вето над сите идни мисии на Косовските безбедносни сили (КБС) на северот на Косово на неограничен период, пренесува Агенција Анадолија (АА).

Во писмото, Курти укажува на можните уставни импликации на размена на писмата од 19 април 2013 година помеѓу тогашниот премиер Хашим Тачи и тогашниот генерален секретар на НАТО, Андерс Фог Расмусен.

„Со овој договор премиерот Тачи, во име на Република Косово, на КФОР му пренесе апсолутно вето на сите идни мисии на Косовските безбедносни сили на северот на Косово за неограничен период“, соопштено е од Владата на Косово.

Курти во писмото упатено на претседателката Османи го нагласи фактот дека по официјалното прифаќање на функцијата премиер на Република Косово, без одложување, ги замолил вработените во Кабинетот на премиерот да ја анализираат содржината на овој таен договор, како и неговата уставна импликација, поточно врската со уставните барања од членот 20 [Трансфер на суверенитетот], член 18 [Ратификација на меѓународните договори] и членот 91 [Промена на претседател].

„Цел на ова писмо е во својство на претседавач со Собранието на Република Косово да ве известам за постоење на таен договор и за резултатите од анализата на Канцеларијата на премиерот. За да се избегне какво било можно недоразбирање, сакам да бидам појасен: јас како премиер не го изразувам ставот во корист или против тајниот договор во врска со неговата содржина. Како премиер, длабоко го разбирам и ценам исклучителното значење на соработката на Република Косово и НАТО во обезбедувањето на полн територијален интегритет на Републиката и нејзините граѓани. И јас, како премиер, го уверувам Собранието, како и сите граѓани на Републиката, дека нема да преземам чекори кои би можеле да го загрозат овој сојуз неопходен за безбедноста на нашата земја“, пишува во писмото.

Во соопштението на Владата на крајот се наведува дека ова писмо му е испратено на претседателот на Косово Хашим Тачи и главниот државен обвинител на Косово, Александар Лумези.

Во дополнително приложениот документ „Мислење“ се наведува дека на 19 април 2013 година во Брисел Тачи потпишал два меѓународни договори. Еден договор е потпишан помеѓу Косово, Србија и ЕУ, кој имал за цел првенствено создавање на автономни структури во рамките на косовските инстуции во општините со српско мнозинство. Тој договор, како што се наведува, е објавен во рок од еден ден, а неколку месеци подоцна, на 27 јуни 2013 година, го ратификувало Собранието на Косово.

Меѓутоа, за разлика од овој договор, другиот договор потпишан тој ден е сокриен од Собранието и од граѓаните на Косово, а она што го разликува од претходно сличните договори со НАТО е дека се однесува на давање апсолутно вето над сите идни мисии на Косовските безбедносни сили на северот на Косово на неограничен период.

Се истакнува дека сокривањето на тој договор може да биде тешко кршење на Уставот на Косово и Уставот не ја исклучува можноста за смена на претседателот за прекршувања кои ги извршил пред да стане претседател.

Во заклучокот се наведува дека „земајќи ги предвид доказите со кои располага Канцеларијата на премиерот, како и релевантни одредби на Уставот на Косово, постои доволно основи да го утврдиме начелото дека претседателот Тачи, додека бил премиер извршил тешка повреда на Уставот и дека извршување на такви прекршувања оправдува започнување уставни постапки за негово разрешување од позицијата претседател на Република Косово.“