Милорад Додик бара депортација на високиот претставник за БиХ Кристијан Шмит

БЕЛГРАД (АА) - Српскиот член на Претседателскиот совет на Босна и Херцеговина, Милорад Додик, денеска побара депортација на германскиот политичар кој ја извршува функцијата висок претставник во земјата, обвинувајќи го за мешање во пресрет на општите избори во октомври, јавува Агенција Анадолија (АА).

За време на состанокот на Претседателскиот совет, Додик го обвини Кристијан Шмит дека ги злоупотребил неговите „Бонски овластувања“, со тоа што влијаел на општите избори преку неговите средства и го поткопал уставниот поредок на земјата.

Високиот претставник има широки овластувања познати како „Бонски овластувања“, кои му овозможуваат да поднесува извештаи до ОН за случувањата и предизвиците во Босна и Херцеговина на годишно ниво.

„Мислев дека членовите на Претседателскиот совет на Босна и Херцеговина ќе одобрат да нема висок претставник во Босна и Херцеговина, бидејќи Шмит не е назначен со одлука на Советот за безбедност на Обединетите нации.“

„Сите негови дејствија се ништовни и [тој] мора да биде протеран во согласност со постапката за странци кои го нарушуваат уставниот поредок во Босна и Херцеговина“, рече Додик.

Бошњачкиот член и претседател на Советот, Шефик Џаферовиќ и хрватскиот член Жељко Комшиќ, го одбија барањето на Додик, кој исто така побара да се затвори и Канцеларијата на високиот претставник (OHR) во земјата.

„Шмит ги искористи своите „Бонски овластувања“ за да ги финансира општите избори во земјата на 2 октомври“, тврди Додик, наведувајќи ја неговата најава за доделување 6,5 милиони евра за Централната изборна комисија.

Новото сценарио се појави откако Шмит за време на прес-конференцијата во Сараево во вторникот изјави дека Советот за имплементација на мирот (PIC) мораше да искористи вонредни овластувања поради предизвиците во распределбата на потребните средства за изборите во земјата.

Тој рече дека оваа одлука ќе стапи на сила веднаш штом ќе биде објавена во Службен весник и нагласи дека со законската регулатива донесена од Бонските овластувања, финансискиот проблем ќе се реши не само за овогодишните избори, туку и за сите идни избори.

ОХР беше формиран со Дејтонскиот мировен договор со кој заврши војната во Босна и Херцеговина која траеше од 1992 до 1995 година. Канцеларијата го надгледува спроведувањето на мировниот договор во земјата во име на меѓународната заедница. Високиот претставник ги координира и активностите на меѓународните институции кои работат во земјата.

Високиот претставник има овластување да разрешува секој кој се меша во спроведувањето на мирот во земјата, вклучително и членовите на Претседателскиот совет, и да донесува закони по потреба.

Вонредните овластувања на Советот за имплементација на мирот ѝ беа доверени на Канцеларијата на високиот претставник за Босна и Херцеговина во 1997 година за време на состанокот во Бон, Германија, и беа наречени „Бонски овластувања“.