Муслиманската заедница во Северна Македонија со реакции за претворањето на Јени џамијата во Битола во музеј

СКОПЈЕ (АА) – По вчерашното претворање на Јени џамијата (Нова џамија) во Битола во Музеј на христијанското и исламското културно наследство муслиманската заедница во Северна Македонија упати остри реакции, јавува Анадолу.

Преку Писмо на добра намера упатено до премиерот Христијан Мицкоски, првиот вицепремиер на Владата, Изет Меџити, официјални претставници и други институции, Исламската верска заедница на Северна Македонија (ИВЗ) ја изрази својата „длабока загриженост“ за претворањето на џамијата во Битола во Музеј на христијанското и исламското културно наследство.

Во реакцијата на ИВЗ се истакнува дека е неприфатливо да не се консултира Исламската верска заедница за оваа иницијатива и да не се бара согласност за нејзина пренамена.

„Јени џамијата во Битола е изградена во 1558 година за време на османлискиот период. Во времето на комунизмот, државата ја заплени и прво ја користеше како магацин, а потоа ја направи уметничка галерија. По прогласувањето на независноста на Македонија, Исламската верска заедница доследно и континуирано бара враќање на Јени џамијата и муслиманските верници во Битола да ја користат како место за богослужба“, вели ИВЗ во својата реакција, додавајќи дека државата никогаш не го исполнила ова барање и со години ја користела џамијата како уметничка галерија.

„Сега, без согласност од ИВЗ на РСМ, НУ Завод и Музеи Битола, Јени џамијата ја претвори во Музеј на христијанското и исламското културно наследство“, истакнува ИВЗ и посочува дека како конструктивен субјект смета дека е исклучително важно да се зачува и промовира духот на толеранцијата и почитувањето на верската и културната различност:

„Ние како претставници на муслиманските верници остро се спротивставуваме на оваа иницијатива за претворање на Јени џамијата во музеј и повикуваме на итен прекин на секоја активност што го нарушува светиот дух на џамијата.“

ИВЗ ги повика надлежните органи во РСМ да ги остварат своите овластувања во согласност со законските одредби, а дипломатските претставништва и локалните и меѓународните културни институции со своето влијание да ја заштитат Јени џамијата во Битола како исламски верски објект со значителна културна вредност.

„Само преку отворен дијалог, институционална соработка и почитување на верските чувства на секој верник може да се изгради цивилизирано и толерантно општество. Со почит и надеж дека ова прашање ќе се реши со цел да се зачуваат соживотот и мирот како скапоцена вредност во нашата држава“, се вели на крајот од реакцијата.

- Реакции од пратениците во Собранието на РСМ -

По повод претворањето на џамијата во музеј со реакции излегоа и пратеници во Собранието на Република Северна Македонија.

Скендер Реџепи, лидер на Народно движење и пратеник во Собранието на Северна Македонија, во својата реакција на социјалните мрежи, нагласувајќи дека „бесрамно џамијата од 5 век во Битола (Јени џамија) се претвора во христијанско православен музеј“, напиша:

„ Кога велиме дека агендата на оваа Влада е деалбанизација на државата, излегува дека повторно малку сме кажале бидејќи сега на ред дојде деисламизацијата на источниот дел на РСМ.“

Бејџан Иљас, претседател на Демократска партија на Турците на Македонија и пратеник, остро го осуди претворањето на ова османлиско исламско дело во музеј, кое претходно се користело како уметничка галерија.

„Не е можно да прифатиме османлиско исламско дело да се доведе во оваа состојба. Ги повикувам државните органи да ја исправат оваа неправда колку што е можно поскоро“, напиша Иљас.

Салих Мурат, пратеник во Собранието од Движењето на Турците на Македонија за правда и демократија, преку социјалните мрежи рече: „Остро го осудувам решението за претворање на Нова џамија во Битола во Музеј на христијанското и исламското културно наследство.“

„Оваа произволна и незаконска одлука е во јасна спротивност со основните вредности на нашата земја, нашиот Устав и меѓународното право“, додаде тој.

Мурат ги повика сите пратеници да го кренат гласот против оваа неправедна и незаконска одлука и Владата да преземе итни мерки. „Нашите историски џамии се неделив дел од нашето културно наследство и мора да се зачуваат со нивните суштински функции“, напиша Мурат.

Своја реакција за претворањето на џамијата во музеј изразија и здруженијата „Ќопру“ и „Генч Калемлер“.