На министерскиот состанок во Охрид потпишана заедничка изјава на земјите од групата А5

СКОПЈЕ (АА) - Шефовите на делегациите што присуствуваат на министерскиот состанок на САД-Јадранската повелба во Охрид, предводени од претседавачот и домаќин на состанокот, министерката за одбрана на Република Македонија, Радмила Шекеринска, денеска ја потпишаа Заедничката изјава на земјите од групата А5 (САД, Хрватска, Албанија, Македонија, БиХ и Црна Гора), пренесува Anadolu Agency (AA).

„На денешниот пленарен состанок, сите земји ја потврдивме нашата одлучност да чекориме на патот до целосна интеграција на овој регион, во рамките на евроатлантската заедница. Само така ќе можеме да ја зачуваме безбедноста, стабилноста и просперитетот на овој регион“, рече министерката Шекеринска по потпишувањето.

Шекеринска истакна дека Република Македонија е одлучна да стане 30. земја-членка на НАТО и дека земјите од САД-Јадранската повелба тоа целосно го поддржуваат.

„Еден од заклучоците од состанокот е недвосмислената поддршка за Република Македонија во стекнувањето полноправно членство во НАТО. Го поздравивме и придонесот на Босна и Херцеговина во операциите на НАТО и нејзината посветеност на регионалниот дијалог, соработката и безбедноста“, истакна Шекеринска.

Министерката рече дека земјите-членки на А5 во Заедничката изјава ја потврдија важната улога на САД, Хрватска, Црна Гора и Албанија, како полноправни членки на НАТО, во поддршката на останатите земји-аспиранти.

Во контекст на учеството во мировни мисии, министерката рече дека земјите од А5 ќе продолжат заеднички да придонесуваат кон глобалниот мир и стабилност.

„Ги нотиравме националните одлуки за зголемено учество во мисијата 'Одлучна поддршка' и изразивме подготвеност да разгледаме други можности за заедничко учество во други активности на НАТО, согласно потребите на Алијансата и нашите можности“, додаде министерката.

Дел од Заедничката изјава е и позитивниот став на земјите од А5 околу иницијативата на Македонија, за родовата перспектива во поширок безбедносен контекст, а поздравени се и амбициите на Македонија да има водечка улога во нејзината имплементација.

Како заклучок од успешно реализираниот министерски состанок, министерката Шекеринска рече дека во минатото, регионот многупати знаеше да биде предизвик за Европа, но оти земјите нема да дозволат историјата да се повтори.

„Оваа значајна иницијатива, меѓусебните контакти, довербата покажуваат дека нашиот пристап се менува. Нашите дела покажуваат дека регионалната соработка не е само фраза, таа е реалност. Се надеваме и сме цврсто посветени сите наши земји да бидат дел од НАТО, и со тоа да проектираме стабилност, безбедност и просперитет", рече Шекеринска.

Претседателствувањето со САД-Јадранската повелба од идната година го презема Црна Гора.