Пендаровски се сретна со претседавачот на Воениот комитет на НАТО, Бауер

СКОПЈЕ (АА) - Претседателот на Северна Македонија, Стево Пендаровски, денес го прими претседавачот на Воениот комитет на НАТО, адмирал Роб Бауер, кој престојува во официјална посета на Северна Македонија, пренесува Анадолу.

Според соопштението на претседателскиот кабинет, на средбата се разговарало за процесот на трансформација, опремување и модернизација на Армијата на Северна Македонија и учеството во меѓународни операции и вежби.

„Соговорниците разговараа за соработката меѓу Северна Македонија и НАТО, за актуелните регионални и безбедносни прашања, а беа разменети мислења и информации за состојбите во Украина и улогата на Алијансата во одбраната на украинскиот народ од руската воена агресија“, се вели во соопштението.

Во тој контекст, Пендаровски ја реафирмираше поддршката за Украина и украинскиот народ, посочувајќи дека Северна Македонија како членка на НАТО, во рамките на можностите, ќе продолжи да дава воена, хуманитарна и дипломатска помош, со крајна цел прекин на воената агресија.

Пендаровски и Бауер констатираа дека Алијансата треба да продолжи во своите напори за поддршка на Украина, со цел стабилизирање на ситуацијата во целиот евроатлантски простор.

Претседателот Пендаровски изрази подготвеност за натамошно унапредување на соработката и јакнење на НАТО-сојузништвото во насока на исполнување на заедничките цели за колективна безбедност и мир на европскиот континент.