Пожар во зграда во Скопје каде што се сместени државни институции

СКОПЈЕ (АА) - Пожар избувна изутрина во зграда во Скопје во која се наоѓаат и државни институции, а подоцна тој бил локализиран од противпожарните екипи, јавува Агенција Анадолија (AA).

Станува збор за првиот кат на зградата каде што се наоѓа Државниот инспекторат за животна средина. Во зградата се сместени и канцелариите на Секретаријатот за европски прашања и на Медиумската информативна агенција (МИА).

Командантот на Територијалната противпожарна бригада на град Скопје, Владимир Симоновски, во изјава за новинарите рече дека 9 противпожарни возила и 24 пожарникари интервенирале во гаснењето на пожарот.

„Пожарот го локализиравме околу 8:50 часот“, изјави Симоновски, истакнувајќи дека причинител на пожарот, според првичните проценки, била електричната инсталација.

Според него, никој не бил во зградата за време на пожарот бидејќи тој избувнал пред почетокот на работното време.

Симоновски рече дека само еден пожарникар се пожалил на задушување, при што интервенирала екипа на Брза помош. Пожарникарот е во стабилна состојба.

Според првичните проценки, веќе изгаснатиот пожар ги оштетил првиот кат и надворешноста на зградата.