Претседателот на Албанија во Скопје: Европската интеграција е заеднички проект и стратегиска насока на целиот регион

СКОПЈЕ (АА) - Претседателот на Албанија, Бајрам Бегај, изјави дека европската интеграција е заеднички проект и стратегиска насока на целиот регион, јавува Анадолу.

Бегај престојува во официјална посета на Северна Македонија, каде што беше пречекан од неговата колешка, Гордана Силјановска-Давкова, при што одржаа и заедничка прес-конференција.

За време на конференцијата, Бегај изјави дека на средбата било нагласено оти односите меѓу двете земји се пример за регионална соработка и дека земјите остануваат решени дополнително да ја продлабочат соработката.

„За време на нашиот разговор ги оценивме многу добрите, пријателски и интензивни односи што ги имаме меѓу нашите две земји, како и заедничката посветеност за унапредување на билатералната, регионалната и пошироката соработка во рамките на меѓународните организации. Економската соработка меѓу нашите две земји е важна. Треба уште повеќе да ја продлабочиме оваа политичка, економска и општествена соработка“, рече Бегај.

Говорејќи за улогата на Албанците во Северна Македонија, Бегај рече: „Албанците тука се државотворни и придонесувачи, се соработувачки, конструктивни и демократски. Албанскиот фактор и Албанците биле и остануваат клучни за политичката стабилност во владеењето и во евроатлантскиот напредок на Северна Македонија. Албанија ја оценува како историско достигнување Рамковната спогодба од Охрид“.

Бегај додаде дека за Албанија европската интеграција е важна. „Европската интеграција не е само национална цел на Албанија или Северна Македонија, туку е заеднички проект и стратегиска насока на целиот наш регион. За нас интеграцијата е важна. Нашата стратегиска цел е да ги затвориме поглавјата до 2027 година и да станеме дел од ЕУ до 2030 година. Албанија ја поддржува Северна Македонија во овој процес на интеграција“, рече Бегај.

„Во однос на прашањето поврзано со камповите за бегалци, тоа не е прашање кое нужно подразбира сместување на мигранти во Пустец. Станува збор за план на мерки преземен од албанската Влада во случај да има миграциски бранови. Во моментов, на границата на Албанија, во соработка со Фронтекс, се спроведуваат редовни набљудувања и редовни контроли за непримање бегалци на територијата на Албанија“.

Бегај додаде дека ѝ ги изразил на претседателката Сиљановска-Давкова благодарностите на Албанија за придонесот и соработката што ја имаат со Република Косово.

„Ја оценивме и соработката на двете земји во областа на безбедноста и одбраната како две соседни земји и сојузници во НАТО и оваа соработка им служи на мирот, стабилноста, просперитетот и безбедноста во регионот“, рече меѓу другото Бегај.

Претседателот Бегај во текот на денот ќе биде примен и од други високи претставници на Северна Македонија.