СКОПЈЕ (АА) - Со поддршка на Турската агенција за соработка и координација (ТИКА), во организација на Здружението ЗОР започна доделувањето на 10.000 лектири за библиотеките на училиштата во Северна Македонија во кои наставата се одржува и на турски јазик, јавува Агенција Анадолија (АА).
Доделувањето започна од Основното училиште „Петар Здравковски-Пенко“ во Скопје, а проектот содржи 10 основни дела кои се доделуваат во 64 училишта во 26 општини во Северна Македонија.
На церемонијата учествуваа Халим Омер Согут, координаторот на ТИКА во Скопје, Хаџер Сулооџа, претседателката на Здружението ЗОР, Мевлуде Круезиу, директорка на Основното училиште „Петар Здравковски-Пенко“, Зеќирија Хасипи, директор на Бирото за развој на образованието, Ѓонул Бајрактар, државен советник за образовни политики при Министерството за образование и наука, како и наставници и ученици од училиштето.
Координаторот на ТИКА во Скопје, Согут, изјави дека ТИКА во Северна Македонија досега реализирала 1.200 проекти, од кои три четвртини се во областа на образованието.
Тој нагласи дека во рамките на реализираните бројни проекти изградени се училишта, спроведено е нивно опремување, обука за наставниците, доделување на школски прибор за децата и други проекти.
„Овој проект за првпат е реализиран во 2020 година. Проектот се состои од повеќе фази“, рече Согут, додавајќи дека во реализирањето на проектот се вклучени издавачка куќа, здружение, Министерството и ТИКА.
Директорката на Основното училиште „Петар Здравковски-Пенко“, Круезиу, упати благодарност за подароците, односно за книгите донирани за децата во училиштето, за кои истакна дека верува дека ќе бидат прочитани со голема желба.
„Отворени сме за соработка. Ова вреди многу. Нашето училиште е мултиетничко училиште во кое наставата се спроведува на три јазици, односно на албански, македонски и турски јазик. Имаме 1.700 ученици. Нашето училиште во моментот има потреба од сѐ бидејќи е големо училиште“, додаде Круезиу.
Претседателката на Здружението ЗОР, Сулооџа, рече дека овие лектири од Издавачката куќа „Јени Балкан“ ги доделуваат со слоганот „Богатството од минатото го носиме во иднината“. Таа упати благодарност до сите вклучени за реализирањето на проектот.
Директорот на Бирото за развој на образованието, Хасипи, истакна дека во проектот има книги од автори од Туркије, од Северна Македонија, како и автори од светската литература. „Сакам да истакнам дека тие [книги] ќе дадат голем придонес за нашите деца и од литературен и од културолошки аспект“, додаде Хасипи.
