Унгарија: Додека членството на Северна Македонија во ЕУ се блокира, продолжува притисокот на ЕУ за Украина

Унгарија изјави дека е невозможно Украина да влезе во Европската унија (ЕУ) пред балканските земји, отфрлајќи го „притисокот од Брисел“ да му даде приоритет на членството на Киев, јавува Анадолу.

Како што најави меѓународниот портпарол на унгарската влада Золтан Ковач, министерот за надворешни работи Петер Сијарто изјави дека иако ЕУ ќе има корист од проширувањето на Западен Балкан, членството на Украина економски и безбедносно ќе го уништи функционирањето на ЕУ.

Изјавата дојде откако Сијарто се состана со министерот за Надворешни работи на Северна Македонија, Тимчо Муцунски во Будимпешта.

Сијарто додаде дека едноставно е бесмислено да се сугерира дека Украина е во подобра состојба од која било земја од Западен Балкан.

Укажувајчи на „двојните стандарди“ на ЕУ, Сијарто истакна:

„Интересно е што додека некои земји ги блокираат преговорите за членство на Северна Македонија, тие никогаш не се нападнати, а ние сме под притисок од либералниот мејнстрим само затоа што ги браниме правата на Унгарците во Закарпатија“.

Унгарскиот шеф на дипломатијата изрази солидарност по смртоносниот пожар во ноќен клуб во Кочани, каде што животот го загубија 59 лица.

„Унгарија застана и продолжува да стои до Северна Македонија за време искушението и процесот на оваа многу сериозна трагедија“, рече тој, потсетувајќи дека шест повредени жртви се лекуваат во Унгарија и владата е подготвена да обезбеди дополнителна помош.

Сијарто, исто така, најави дека во тек се подготовки за меѓувладин договор што ќе им овозможи на унгарските компании да учествуваат во програмите за развој на инфраструктурата на Северна Македонија, можност која, како што нагласи, „нуди сериозен потенцијал за унгарските бизниси“.

Во меѓувреме, во изјава на социјалните мрежи, Муцунски се заблагодари за поддршката на Унгарија во лекувањето на повредените пациенти од Кочани, нарекувајќи го тоа како силен знак за длабокото партнерство меѓу двете земји.

Муцунски се обрати и пред Унгарскиот совет за дипломатија.

Тој изјави дека со Советот споделиле перспективи за клучните европски и регионални прашања.

„Разговаравме за економските врски, инвестициите, регионалната стабилност, безбедноста и нашите предизвици за интеграција во ЕУ“, рече шефот на дипломатијата на Северна Македонија.