Хрватска: Патнички катамаран насукан кај островот Премуда

РИЕКА (АА) - Патнички катамаран се насука на карпата Брачиќи, пред пристаништето Премуда во Хрватска, а десетици патници беа пренесени на брегот и беа подложени на лекарски преглед, јавува Анадолу.

Националниот центар за координација на потрагата и спасувањето на море (МРЦЦ Риека) го информираше Министерството за море, транспорт и инфраструктура за поморската несреќа на патничкиот катамаран, кој денес околу 18:20 часот се насука на карпата Брачиќи, пред пристаништето Премуда, а за несреќата била известена и поморската станица и аеродромската полиција во Задар, соопшти Министерството за море, транспорт и инфраструктура на Хрватска.

Во моментот на несреќата на катамаранот имало околу 70 патници, поради тоа МРЦЦ Риека му наложил на патничкиот брод „Владимир Назор“ да се пренасочи од рутата и да ги евакуира патниците од катамаранот, по што сите патници се симнати на Силба, каде им бил извршен лекарски преглед.

Надлежните од Капетанијата на Задар на местото на поморската несреќа вршат прелиминарна истрага за причините за насукувањето.