БРИСЕЛ (АА) - Земјите во Европа преземаат различни мерки како ограничување на цените на енергијата, намалување на даноците, помагање на граѓаните кои имаат потреба од помош и намалување на температурите во јавните згради наспроти рапидно растечките цени на природниот гас и електричната енергија, јавува Агенција Анадолија (АА).
Рускиот прекин на испораката на природен гас за Европа по економските санкции што се воведени поради руско-украинската војна, предизвика невидена енергетска криза низ целиот континент.
Цените на природниот гас на европските пазари се зголемија над десетпати на годишно ниво, достигнувајќи историски високи нивоа - зголемување кое нагло предизвика раст на цените на електричната енергија.
Цените на електричната енергија во трговијата на големо во европските земји пораснаа и до осумпати.
Европската Унија и земјите членки се обидуваат да имплементираат различни мерки за заштита на потрошувачите од брзиот пораст на цените и да обезбедат сигурност во снабдувањето со енергија.
- Мерки на Европската Унија -
Европската Унија (ЕУ) подготви план за итна состојба во случај да се прекине протокот на природен гас од Русија.
Како дел од планот, сите земји членки треба да ја намалат потрошувачката на гас за 15 отсто, што значи користење помалку гас, околу 45 милијарди кубни метри годишно низ земјите во Унијата.
ЕУ, исто така, подготви законски регулативи за обврска за пополнување на подземните резервоари за природен гас за земјите членки до претстојната зима – 80 отсто до 1 ноември.
Откако Русија на неодреден период го прекина протокот на природен гас во Европа преку гасоводот „Северен тек“, министрите за енергетика на земјите на ЕУ се состанаа да ги утврдат новите мерки против растот на цените.
Земјите од ЕУ веднаш ѝ дадоа задача на Европската комисија да подготви регулатива што ќе вклучува ограничување на приходите на производителите на електрична енергија со ниска цена, придобивките од компаниите за фосилни горива, наметнување висока цена на природниот гас, намалување на побарувачката на електрична енергија и обезбедување ликвидност за енергетските компании.
Деталите за овие регулаторни предлози се очекува да бидат официјално објавени за неколку дена.
- Мерките на Германија -
Во Германија, Владата подготви три различни пакети помош во вкупна вредност од 125 милијарди евра за намалување на последиците од растечките цени на енергијата врз граѓаните.
Даноците за гориво се намалени, а до септември беа овозможени неограничени билети за јавен превоз за 9 евра месечно.
Земјата ја ограничи температурата на греењето на максимум 19 Целзиусови степени за јавните згради и донесе одлука да го исклучи осветлувањето на јавните згради и споменици, како и билбордите.
Забрането е користење на системите за загревање на базените.
Одредени фабрики за јаглен, што во минатото се планираше да бидат затворени, повторно се пуштени во употреба.
Земјата одлучи да задржи две нуклеарни централи, што претходно требаше да бидат затворени.
Германија одлучи и да ги задржи на константно ниво цените за основната потрошувачка на електрична енергија и да исплати еднократна помош од 300 евра на пензионерите и 200 евра за студентите поради зголемените сметки за енергија.
Дополнителна поддршка од 300 евра им е дадена на вработените и 100 евра по дете за семејствата.
Од граѓаните беше побарано да штедат струја и енергенси.
Дополнителен буџет е издвоен за енергетско ефикасно реновирање на старите згради.
Одлучено е да се обезбеди дополнителна поддршка за трошоците за греење на сите што добиваат помош во домување низ целата земја.
Владата најави и дека земјата ќе продолжи да обезбедува струја за луѓето кои не можат да си ги платат сметките.
Државата ќе оданочува и неочекувано високи профити на енергетските компании.
Се очекува државата да објави дополнителни мерки за помош во наредните денови.
- Мерките во Франција -
Франција одлучи да ги замрзне цените на природниот гас бидејќи нивото во октомври 2021 година и поскапувањето на електричната енергија до крајот на годината беше ограничено на 4 отсто.
На домаќинствата што имаат потреба им беше обезбедена поддршка за плаќање енергија од 100 евра.
Подготвена е и програма за заштеда со цел намалување на потрошувачката на енергија за 10 отсто.
Степенот на греење и ладење во јавните згради беше ограничен на минимум 26 степени за клима-уредите и максимални 19 степени за греалките.
Продавниците треба да ги исклучуваат светлата на излозите од 1:00 до 6:00 часот наутро.
Владата обезбеди и помош во гориво за посиромашните.
- Велика Британија -
Велика Британија обезбеди поддршка од 400 фунти за сметките за енергија за домаќинствата со ниски приходи.
Уште 650 фунти се исплатени на сиромашните луѓе кои добиваат државна помош, а дополнителни 300 евра им се исплатени на пензионерите.
Беше одобрен планот за новата нуклеарна централа, и најавено е дека ќе бидат поддржани и активностите за гасот од шкрилци.
Продолжен е и периодот за работа на одредени електрани на јаглен.
Земјата одлучи да ги задржи константни цените на вкупните годишни сметки за енергија на домаќинствата за две години на максимум 2.500 фунти годишно.
Домаќинствата ќе добијат дополнителна помош од 400 фунти за сметките за енергија.
Ќе се издаваат лиценци за работа со нови наоѓалишта на гас и нафта во Северното Море.
- Мерките на Италија -
Даноците за гориво се намалени со цел борба против брзорастечките трошоци.
Дадена е поддршка за сметките за енергија на семејствата со ниски приходи и исплатени им се по 200 евра на посиромашните.
Обезбедени се субвенции за инвестиции во соларна енергија.
Енергетските компании се спречени еднострано да ги менуваат договорите.
Со Алжир се потпишани нови договори за снабдување со природен гас.
Во земјата се подготвува нов план за заштеда на многу поголеми количини енергија преку домовите и јавните згради.
- Мерките на Шпанија -
Во зимскиот период, температурата на термостатите е ограничена на 19 степени.
Светлата на излозите на продавниците и осветлувањето во јавните објекти треба да се исклучуваат во 22 часот по локално време.
Земјата одлучи од октомври да го намали ДДВ-то за природен гас од 21 отсто на 5 отсто.
Од граѓаните и деловните субјекти е побарано да штедат енергија.
- Мерките на Грција -
Грција најави серија мерки за заштеда за намалување на потрошувачката на енергија за 10 отсто во јавните институции.
Преземени се мерки за одржување на температурата во јавните згради на 27 степени во летната сезона и 19 степени во зимската сезона.
Системите за греење, ладење и осветлување треба да се исклучуваат кога зградите не се во употреба.
Земјата ќе формира специјални оддели за подигање на свеста на институциите за заштеда на енергија.
Започнати се кампањи за да им се помогне на граѓаните во штедењето енергија.
- Мерките на Унгарија -
Греењето во јавните згради во земјата е ограничено на 18 степени.
Цените на горивата се одржуваат под пазарните цени.
Одлучено е користењето на природниот гас во јавните институции да се намали за 25 отсто.
Регулативите за сеча на дрвја се ублажени со цел да се обезбеди огревно дрво.
- Мерките на Полска -
Полска воведе даночни намалувања за енергетските производи, а обезбедена е и парична помош за домаќинствата.
Продолжена е примената на ниската цена на гасот за домаќинствата, училиштата и болниците.
Земјата им исплати на домаќинствата 650 евра за да им ги помогне во трошоците за греење.
- Мерките на Белгија -
Земјата го продолжи времетраењето на тарифите за социјална енергија за сиромашните лица.
Белгија обезбеди поддршка од 225 евра за оние што ги греат своите домови на нафта и 100 евра за сметките за струја.
Намалени се даноците на бензинот и дизелот.
Земјата го продолжи траењето на намаленото ДДВ за енергија.
Намалување на данокот е дадено за производи како топлински пумпи, соларни панели или материјали за топлинска изолација.
Осветлувањето во јавните згради треба да се исклучува во периодот од 19 часот до 6 часот наутро.
Земјата одлучи да ја постави температурата на греењето на најмногу 19 степени.
Белгија планира да воведе дополнителни даноци за компаниите чиј профит ќе достигне високо ниво.
Периодот на работа на двете нуклеарни централи, што се планираа да бидат затворени во 2025 година, е продолжен за 10 години, а земјата одлучи двата реактори, што се планираше да се затворат оваа зима, да продолжат со работа.
- Мерките на Бугарија -
Земјата ги намали даноците за гориво, а данокот на сметките за струја и природен гас во домаќинствата е укинат.
Зголемувањето на сметките за електрична енергија за домаќинствата исто така е ограничено на 3,4 отсто.
