Мислење на експертите: Одлуката на Бајден за забрана на руската нафта има своја цена

АНКАРА (АА) - Храбриот потег на американскиот претседател Џо Бајден да го забрани увозот на руска нафта ќе им наметне трошоци на Американците преку повисоките цени на бензинот, изјави Ричард Каузларич, директор на Центарот за енергетска наука и политика на Универзитетот „Џорџ Мејсон“.

Бајден вчера потпиша извршна наредба со која се забранува увоз на руска нафта, течен природен гас (ЛНГ) и јаглен во САД.

Каузларич, поранешен амбасадор на САД во Азербејџан, за Агенција Анадолија (АА) изјави дека прекинот на увозот на руска нафта нема да има толку големо влијание врз физичката побарувачка за овие деривати во САД.

САД не зависат толку од руската нафта и гас како нивните сојузници во Европа, бидејќи таа земја увезува само 8 проценти од нафтата и рафинираните производи од Русија.

Сепак, Каузларич рече дека Американците би очекувале прекинот на увозот од Русија да се компензира со зголемување на домашното производство на нафта и гас.

„Американците ќе бараат каков било знак дека меѓународните енергетски компании имаат корист од повисоките цени и ќе очекуваат САД да произведуваат повеќе нафта и гас во земјата“, објасни тој.

Забраната за увоз тешко ќе ја погоди руската економија бидејќи во голема мера зависи од приходите од енергијата.

„Потегот доаѓа со двопартиска поддршка и дополнително ќе го лиши рускиот претседател Владимир Путин од економските ресурси што ги користи за да ја продолжи својата војна против Украина“, се вели во соопштението на Белата куќа.

Според Белата куќа, САД минатата година увезле речиси 700.000 барели сурова нафта и рафинирани нафтени деривати од Русија.

На Американците сега им е забрането да финансираат или да дозволуваат странски компании да инвестираат во производството на енергија во Русија.

По одлуката на Бајден, во вторникот, на 8 март, цените на бензините во САД се искачија на највисоко ниво во последните 14 години, според податоците собрани од АА.

Државниот просек беше 4.173 долари за галон за обичен бензин, што е највисок од јули 2008 година, според податоците на Американската автомобилска асоцијација.

Највисоката цена беше во Калифорнија и изнесуваше 5.444 долари за галон. Следуваат Хаваи со 4.718 долари и Невада со 4.674 долари.