Aysu Biçer
26 Јануари 2022•Ажурирај: 27 Јануари 2022
АНКАРА (АА) - Турција и Грција потпишаа протокол за унапредување на билатералните трговски односи и соработка на повеќе полиња, соопшти во вторникот турското Министерство за трговија, пренесува Агенција Анадолија (АА).
Петтиот состанок на Турско-грчкиот заеднички економски комитет (ЈЕК) се одржа во Атина, а на крајот на состанокот беше потпишан Протоколот за неговиот петти мандат.
Делегациите дискутираа за прашања од заеднички интереси, вклучително и за начините за подобрување на обемот на билатералната трговија, охрабрување на компаниите да развиваат заеднички потфати во Грција и Турција, зајакнување на соработката во енергетиката и транспортните сектори.
Турско-грчкиот механизам ЈЕК, чиј последен состанок беше одржан во Анкара во 2010 година, повторно е активиран по повеќе од 10 години, во согласност со политиката на одржување билатерални трговски и економски односи врз основа на позитивна агенда и дијалог.
Во согласност со зголемените трговски и економски односи на Турција со ЕУ во 2021 година, трговските и економските односи со нејзиниот пограничен сосед Грција, исто така се зголемија, според турското Министерство за трговија.
„Петтиот состанок на ЈЕК ќе игра значајна улога во одржувањето позитивен моментум во трговските и економските односи со Грција и зголемувањето на можностите за соработка“, соопшти Министерството.
Трговскиот обем помеѓу Турција и Грција во 2021 година изнесуваше 5,2 милијарди долари, што претставува пораст од 69,2 отсто во споредба со 2020 година.
Обемот на трговија помеѓу двете земји тројно се зголеми од 2005 година.
Извозот на Турција за Грција се зголеми за 73,3 проценти во 2021 година, што резултира со трговски суфицит од речиси 1 милијарда долари.
