Шефот на МАЕ: Тековната енергетска криза е полоша од претходните нафтени шокови

ИСТАНБУЛ (АА) – Тековната глобална енергетска криза е посериозна од нафтените шокови во 1973 и 1979 година, како и од недостигот на гас во 2022 година поврзан со војната на Русија во Украина, изјави денес директорот на Меѓународната агенција за енергија (МАЕ), Фатих Бирол, јавува Анадолу.

Говорејќи во поткаст, Бирол посочи дека глобалните загуби во снабдувањето моментално достигнуваат околу 12 милиони барели дневно, во споредба со околу 5 милиони барели дневно за време на кризите во 1973 и 1979 година.

Тој додаде дека, иако глобалното снабдување со гас се намали за околу 75 милијарди кубни метри во 2022 година, тековниот недостиг е уште поголем.

„Април ќе биде многу полош од март“, рече Бирол, нагласувајќи дека минатиот месец сè уште имало одредени испораки на нафта и течен природен гас од Блискиот Исток.

„Но, во април – нема ништо.“

Бирол истакна дека МАЕ одлучила да ослободи 400 милиони барели нафта од итните резерви, оценувајќи го тоа како најголем ваков потег досега.

„Но, морам да бидам многу искрен, ова само ја намалува болката. Тоа не е решение“, рече тој. „Решението е отворање на Ормускиот Теснец.“

Тој го опиша повторното отворање на Теснецот како најважното прашање во моментот, додавајќи дека сегашните мерки само купуваат време.

Бирол предупреди дека кризата досега најсилно ја погодила Азија, но се очекува да се прошири и кон Европа и пошироко.

„Најголемиот проблем денес е недостигот на авионско гориво и дизел“, рече тој, додавајќи дека недостигот веќе е видлив во Азија и веројатно ќе стигне до Европа во април или почетокот на мај.

Тој истакна дека азиските купувачи, кои не можат да обезбедат течен природен гас од Блискиот Исток, се свртуваат кон спот-пазарите од каде што обично се снабдува Европа, што дополнително ја зголемува конкуренцијата и цените.

„Бидејќи цените на електричната енергија во Европа се базираат на маргиналните трошоци на природниот гас, тие ќе пораснат“, заклучи Бирол.