Од утре цените на горивата во ОАЕ ќе се зголемат од 30% до 70%

ИСТАНБУЛ (АА) – Цените на горивата во Обединетите Арапски Емирати (ОАЕ) од утре (1 април) ќе се зголемат од 30% до 70% во екот на растот на глобалните цени на енергентите што е поврзано со тензиите на Блискиот Исток, јавија денес локалните медиуми, пренесува Анадолу.

Според весникот „Ал Бајан“, ќе поскапат дизелот и три вида бензин.

Цената на дизелот ќе порасне за околу 72%, од 2,72 дирхами (0,74 долари) на 4,69 дирхами (1,28 долари) за литар.

Бензинот „Супер 98“ ќе достигне цена од 3,39 дирхами (0,92 долари), што претставува пораст од 30%, а „Спешал 95“ ќе поскапи за 32% и ќе се продава по 3,28 дирхами (0,89 долари).

Цената на бензинот „Е-плус“, исто така, ќе се зголеми за 33,3% и литар ќе чини 3,2 дирхами (0,87 долари).

Во текот на изминатиот месец цените на нафтата на светските пазари се зголемија за околу 40%, што директно влијаеше врз растот на цените на горивата во регионот.