21 Јули 2024•Ажурирај: 24 Јули 2024
ГАЗА (АА) - Палестинците во Газа со месеци се изложени на брутални израелски напади, па често мораат сами да изнаоѓаат различни решенија и начини за да се справат со бројните проблеми во тешките воени услови, јавува Анадолу.
Така двајца браќа во Газа, Салах и Абдула Салми, дошле до идеја поради недостиг на медицински ресурси самите да произведуваат протези, односно протетски екстремитети од пластични цевки за вода за сограѓаните со ампутирани екстремитети.
Мухамед Ал Такрури, Палестинец кој ги загуби екстремитетите во војната во Газа, истакна дека протезата што ја изработиле двајцата браќа многу му помогнала во извршувањето на секојдневните обврски.
„Имам 37 години и татко сум на пет деца. Мојата состојба значително се подобри благодарение на протезата, која ми овозможи самостојно да ги извршувам секојдневните задачи. Можам самостојно да стојам без проблеми додека се облекувам или се движам, намалувајќи ја зависноста од патериците, а ова ми помага и да го изгубам вишокот килограми“, рече Ал-Такрури.
Тој им се заблагодари на браќата кои дојдоа до идејата да направат протетски екстремитети, со што им помогнаа на многумина во Газа.
„Се надеваме дека сите ние, на свој начин, уште повеќе ќе размислуваме уште повеќе за интеграцијата на лицата со попреченост во општеството“, рече Ал-Такрури.
Абдула Салми, еден од браќата кои ги изработува протезите, изјави дека претходно работел во Центарот за протетика во градот Газа.
„Работевме таму, но неодамна прекинавме. Мојот брат Салах дојде до идеја да им помогне на лицата со ампутации, а јас исто така мислев дека ова е добра идеја да им помогнеме на другите“, истакна Палестинецот.
Тој посочи дека е тешко да се дојде до потребниот материјал за изработка на протези поради израелската блокада.
„За среќа, успеавме да најдеме некој материјал и успеавме да направиме протеза и за Маџид Ал-Амарин, од која тој беше многу задоволен. Направивме и протеза за Абу Билал, овозможувајќи му да се движи поудобно и го намали оптоварувањето на неговото тело. Сега се чувствува многу подобро и физички и психички“, рече Салми.
