Тешки времиња за луѓето со албинизам за време на пандемијата на Ковид-19

ЛОНДОН

Утре се одбележува Меѓународниот ден на свеста за албинизмот, и се соопштува дека пандемијата на Ковид-19 го направила многу попредизвикувачки животот на луѓето со албинизам, јавува Агенција Анадолија (АА).

Според податоците на ОН, албинизмот - вродена состојба која се карактеризира со отсуство на пигмент во кожата - е распространета во Северна Америка и Европа кај еден на секои 17.000 до 20.000 луѓе.

Состојбата е многу позастапена во супсахарска Африка, со проценка на еден од 1.400 луѓе кои се засегнати во Танзанија и рапространетоста е висока, дури еден во 1.000 пријавени во избраните популации во Зимбабве и други специфични етнички групи во јужна Африка.

„Добивме вознемирувачки извештаи за луѓе со албинизам кои ги нарекуваат „корона“ и ги обвинуваат за појавата на овој „странски“ вирус“, изјави за АА Сем Кларк, менаџер за комуникации на „Standing Voice“, меѓународна невладина организација.

Здравствените работници велат дека иако нема лек за албинизам, употребата на очила за сонце и облека за заштита од сонце може да спречи заболување од рак на кожата. Овој третман е, за жал, недостапен за луѓето во многу земји поради дискриминација.

Кларк рече дека сегашната пандемија направила да е речиси невозможно неговата организација да собере голем број пациенти и луѓе со албинизам.

Но, тој исто така рече дека невладината организација се приспособила на ситуацијата и дека неговата организација испраќа здравствени пакувања за сончање и заштитна облека во домовите на погодените од албинизмот.

„И, инвестираме во теледерматологијата“, додаде Кларк.

„Така, пациентите кои се загрижени за својата кожа, можат да пристапат брзо до телефонски услуги за консултации.“

- Сиромашни и ранливи -

Луѓето со албинизам веќе се меѓу најсиромашните и најранливите во општеството во Танзанија и Малави - ситуација која ќе се влоши само со економското влијание на Ковид-19. За да ги спречи и понатаму да запаѓаат во сиромаштија, „Standing Voice“ им обезбедува итно домување и финансиска помош.

Кларк рече дека поминувајќи низ историјата, луѓето со албинизам се првите кои се погодени во време на неизвесност и страв.

„Ние правиме сѐ што можеме за да го спречиме тоа во ова време“, рече тој.

Неговата организација дистрибуира упатства за да ги разоткрие митовите и да обезбеди заедниците во Танзанија и Малави да разберат дека не постои поврзаност помеѓу Ковид-19 и луѓето со албинизам.

„Ова е итна и застрашувачка криза за човековите права што заслужува поголемо меѓународно внимание“, рече тој.

Кларк рече дека луѓето со албинизам се соочуваат со мноштво форми на дискриминација.

„Низ цела Африка, особено во Танзанија и Малави, луѓето со албинизам се малтретирани малцинства. Поради нивниот недостиг на меланин, лицата со албинизам се со оштетен вид и во екваторијална клима, тие се изложени на екстремно висок ризик од рана смртност и заболување од карцином на кожата“, рече Кларк.

- Цел на насилство и силување -

Бидејќи тие се побледи од луѓето со темна кожа околу нив, луѓето со албинизам имаат поголеми шанси да станат жртви на насилство и силување.

„Силувањето на жените со албинизам честопати се смета дека лекува неплодност и СИДА, додека бајачите поттикнуваат насилство со ширењето на митот дека делови од телото на лице со албинизам може да создадат богатство“, изјави Кларк.

Оваа конкретна заблуда досега уби 212 луѓе. Напади на други 397 лица со албинизам се пријавени во 29 земји во Африка од 2006 година. Сепак, Кларк рече дека бројките би можеле да бидат многу поголеми.

Минатиот февруари, 92-годишна жена во Малави беше нападната со мачета во сопствениот дом, при што изгуби два прста. Во мај, гробот на еден човек со албинизам во јужниот дел на Малави беше нарушен откопан за ексхумација на деловите од неговото тело.

Во 2014 година, Генералното собрание на ОН го прогласи 13 јуни за Меѓународен ден за свеста на албинизмот.