Necva Taştan Sevinç
22 Октомври 2025•Ажурирај: 24 Октомври 2025
ПАРИЗ (АА) – Музејот Лувр во Париз денес повторно е отворен за посетители, три дена по грабежот на скапоцен кралски накит вреден околу 88 милиони евра од познатата Галерија Аполон, соопшти јавниот обвинител на Париз, Лор Бекво, јавува Анадолу.
Грабежот, кој траел помалку од седум минути, бил извршен од страна на четворица криминалци кои користеле украден товарен лифт за да стигнат до прозорецот на галеријата.
Истражителите откриле дека истиот лифт бил украден девет дена претходно во градот Лувр (Вал-д’Оаз), откако осомничените се претставиле како потенцијални купувачи преку онлајн оглас.
При нивното брзање да избегаат, крадците оставиле кацига, апарат за заварување, радиостаница, жолт елек, ќебе и канта со бензин, кои сега се кај форензичарите.
Иако музејот првично планираше делумно отворање во понеделникот, остана затворен до денес, а раководството соопшти дека одредени делови сè уште се недостапни за јавноста, без да прецизира кои.
Директорката на музејот, Лоренс де Кар, треба да сведочи пред Комисијата за култура при Сенатот, каде што ќе ги објасни околностите на кражбата и ќе ги претстави идните безбедносни мерки.
Министерството за култура соопшти дека биле украдени осум предмети со непроценлива културна вредност, но дека круната на царицата Евгенија била оштетена и оставена на местото на бегството.
Засега нема приведени осомничени.
