Рускиот комитет за доделување Оскар ја прекина работата

МОСКВА (АА)

Рускиот комитет за доделување Оскар, кој годишно номинира домашни филмови за наградата во категоријата најдобар меѓународен долгометражен филм, прекина со работа, изјави денес еден од неговите членови, пренесува Анадолу.

„Бев во комитетот за номинација за Оскар додека работеше. Сега неговите редови значително се намалија, а неговите активности престанаа“, изјави филмскиот продуцент Фјодор Попов за руската новинска агенција ТАСС.

Попов рече дека номинацијата за Оскар би изгледала крајно несоодветна во околности кога Русија е строго санкционирана поради војната во Украина.

ТАСС, повикувајќи се на два други извора, објави дека оваа година Русија нема да номинира ниту еден филм за престижната награда што ја доделува Американската академија за филмски уметности и науки (AMPAS).

Во септември 2022 година Руската национална академија за кинематографски уметности и науки објави дека претседателството одлучило да не номинира домашен филм за Оскар таа година.

Павел Чукреј, претседателот на рускиот комитет за Оскар, не се согласи со одлуката и ја напушти комисијата, а многу други членови го следеа неговиот пример. Формално, сепак, комитетот сè уште постои.