Nazmi Abduramani
11 Февруари 2016•Ажурирај: 12 Февруари 2016
СКОПЈЕ (АА) - Граѓанската асоцијација „МОСТ“, Институтот за комуникациски студии, Транспаренси Интернешнл – Македонија, Центарот за економски анализи и Цивил – Центар за слобода, денес потпишаа Меморандум за соработка со цел формирање на транспарентна и инклузивна платформа за соработка и комуникација базирана на Декларацијата за глобалните принципи за непристрасно набљудување и мониторинг на изборите од страна на граѓански организации, како и промоција на заеднички стандарди и начини на однесување во текот на процесот, јавува Anadolu Agency (AA).
"Меморандумот има за цел да создаде транспарентна и инклузивна платформа за соработка и комуникација базирана на Декларацијата за глобалните принципи за непристрасно набљудување и мониторниг од страна на граѓанските организации, и да ги промовира заедничките стандарди и начини на однесување во текот на овој процес", изјави Слаѓана Тасева од организацијата Транспаренси Интернешнл.
Сите организации-потписнички на меморандумот се согласија да соработуваат за да ги штитат правата на гласачите и политичките актери, со строга непристрасност и без дискриминирање, неразумни ограничувања, мешања или заплашувања.
Соработката меѓу другото ќе се базира врз почитување на уставот, законите и меѓународните обврски поврзани со изборите, непристрасност и политичка неутралност, како и непристрасно, точно и навремено известување засновано на факти.
Декларацијата е потпишана на 3 април 2012 година под покровителство на Обединетите Нации, поддржана е од страна на повеќе меѓувладини организации, а потпишана е од страна на 160 невладини организации од целиот свет.
